Vonesat i kushtojnë sërish shumë shtrenjtë Manchester City. Premier League ka vendosur një gjobë prej 1,1 milionë stërlinash, që i korrespondojnë më shumë se 1,2 milionë eurove, ndaj klubit anglez, për mosrespektimin e orarit të nisjes së ndeshjeve dhe të rifillimit të pjesëve të dyta në nëntë ndeshje të sezonit 2024/25, për një total prej dhjetë shkeljesh mes tetorit dhe shkurtit. Vonesat variojnë nga një minutë e 29 sekonda deri në dy minuta e 24 sekonda, kjo e fundit e regjistruar përpara nisjes së pjesës së dytë të derbit të Manchesterit kundër United në dhjetor 2024.
Sanksioni ndaj skuadrës së Pep Guardiolës lidhet me rregullin 33 të Premier League, i cili kërkon pikërisht respektimin e orarit në fillimet e ndeshjeve dhe në rifillimin e lojës në pjesën e dytë: “Rregullat që lidhen me nisjen e ndeshjeve dhe rifillimet e lojës kontribuojnë në garantimin që organizimi i kompeticionit të respektojë standardet më të larta profesionale të mundshme dhe t’u ofrojë siguri tifozëve dhe klubeve pjesëmarrëse", lexohet në njoftimin e Premier League.
Lexo më tej: Manchester City e nis me fitore Botërorin e Klubeve: Foden e Doku shembin Wydad
Gjithashtu, kjo garanton që transmetimi i çdo ndeshjeje të Premier League-s të zhvillohet brenda kohëve të parashikuara”. Gjithsesi, kjo e City është një… zakon i keq: sezonin e kaluar gjoba ishte edhe më e lartë – 2,09 milionë stërlina për shkak të vonesave në 22 ndeshje.
