Rrjeti mediatik amerikan "Fox News" ka publikuar një artikull të ish-ambasadorit shqiptar në SHBA, Agim Neshos.
Në artikull, Nesho shkruan se ndërsa Europa pretendon të mbrojë demokracinë, ajo heshturazi po fuqizon autokratë si kryeministri shqiptar Edi Rama. Ish-ambasadori vijon duke shkruar se, i zgjedhur për mandatin e katërt me një shumicë të fuqishme që mund të ndryshojë Kushtetutën, Rama njihet nga kritikët si "Ramaduro" i Europës, një referencë për Nicolás Maduron e Venezuelës, për korrupsionin e dyshuar, tendencat autokratike dhe mjeshtërinë në mashtrimin politik.
"Ish-dishepulli i George Soros dhe ‘Shoqërisë së Hapur’, Rama është shndërruar në një kameleon politik, duke formësuar imazhin e tij për t’iu përshtatur interesave të elitave globale dhe sundimtarëve rajonalë.
I nënshtruar ndaj kryeministres italiane Giorgia Meloni, bashkëpunues me presidentin turk Recep Tayyip Erdoğan dhe mbështetës i presidentit francez Emmanuel Macron në këmbim të influencës më të madhe në Ballkan, Rama siguroi mandatin e katërt radhazi përmes zgjedhjeve që shumë i përshkruajnë si thellësisht të manipuluara, e paimagjinueshme për një shtet anëtar të NATO-s dhe aspirant për BE-në.
Rama u ngrit nga përfaqësues i ‘Shoqërisë së Hapur’ në Tiranë në udhëheqës të një vendi me një prej trashëgimive më brutale komuniste në Europë. Kritikët e përshkruajnë si narcist dhe anarkist, një produkt i influencës post-komuniste të Sorosit në Europën Lindore. Ai konsolidoi pushtetin në Shqipëri duke promovuar iniciativën "Ballkani i Hapur" të mbështetur nga Soros. Kohët e fundit, ka marrë një rol të ri: si socialisti progresist që punoi për të minuar iniciativat e epokës Trump në Evropë.
I njohur për retorikën anti-Trump, përfshirë deklaratën e famshme në CNN dhe Foreign Policy, ku e quajti Trump "turpin e qytetërimit tonë", Rama u bë i preferuari i elitave europiane dhe demokratëve amerikanë. Mbijetesa e tij politike varej nga përshtatja me rendin anti-Trump, edhe pse udhëheqja e tij brenda vendit po shkon drejt autoritarizmit.
Sot, ndërsa Europa përballet me një botë multipolare dhe sfida komplekse gjeopolitike, ajo gjithnjë e më shumë toleron, nëse jo edhe miraton, udhëheqës si Rama. Pse? Sepse ai deklaron besnikëri ndaj "vlerave europiane," megjithëse drejton, sipas kritikëve, një shtet narkotik të ndërtuar mbi krim të organizuar dhe manipulim elektoral.
Rama përfaqëson një version europian të modelit Chávez-Maduro: një autokrat i majtë i mbuluar me gjuhë progresiste, që ushtron pushtet pa shumë respekt për normat demokratike. Ai mishëron stabilokracinë që po shkatërron Ballkanin, regjime të toleruara për hir të qetësisë rajonale, edhe pse shkatërrojnë vetë ato vlera që Europa pretendon t’i mbrojë.
Përpjekja e fundit e Sekretarit amerikan të Shtetit, Marco Rubio, për të bllokuar rinovimin e kontratës së Chevron-it në Venezuelën e Maduro-s është një shembull guximtar i lidershipit me parime, duke i mohuar regjimeve autoritare legjitimitetin dhe burimet. Amerika duhet të tregojë të njëjtën qartësi edhe ndaj Ballkanit.
Madje shumë shqiptarë tashmë e quajnë udhëheqësin e tyre "Ramaduro", një sinjal i dëshpëruar për ndihmë nga SHBA për rikthimin e demokracisë. Pozicioni i Amerikës duhet të jetë një zgjim për Europën, e cila është mësuar të bashkëjetojë me regjime mafioze të bazuara në korrupsion dhe shtypje. Europa nuk mund të justifikojë mbështetjen ndaj autokratëve vetëm sepse kritikët e tyre janë konservatorë apo të lidhur me presidentin Trump.
Është koha që diplomacia amerikane të ndërmarrë hapa konkretë. Kjo do të thotë shtim presioni ndaj udhëheqjes shqiptare, mbështetje publike për zgjedhje të lira e të ndershme dhe një mesazh të qartë: përputhja me vlerat perëndimore matet me veprime, jo me deklarata boshe", shkruan Nesho në artikullin e publikuar në "Fox News".
