Christian Chivu bëri debutimin zyrtar si trajner i ri i Inter në ndeshjen e parë të zikaltrëve në Kupën e Re të Botës për Klube. Përballja kundër meksikanëve të Monterrey përfundoi megjithatë 1-1. Një rezultat që lë shije të hidhur, duke qenë se në prag të sfidës Lautaro dhe shokët e tij në letër dukeshin favoritët e mëdhenj për fitoren. E megjithatë, deri në fund Inter rrezikoi edhe ta humbiste. Një epilog që bëri që disa gazetarë, në konferencën për shtyp, t’i bënin pyetje trajnerit rumun pikërisht për paraqitjen e Interit në fushë.
Në mënyrë specifike, një gazetar meksikan i drejton në spanjisht një pyetje rumunit Chivu, pikërisht në lidhje me rezultatin përfundimtar të ndeshjes: “Si e komenton këtë rezultat për skuadrën tuaj, nëse është i befasuar. Si e gjykon? Befasues, të turpshëm, si një ndeshje prove?” Fjala “turpshëm” bëhet menjëherë objekt diskutimi në sallën e shtypit. Gazetari thotë “vergonzoso”, që mund të nënkuptojë edhe diçka tjetër, dhe Chivu i kërkon menjëherë përkthyesit që ka pranë sqarime: “Tha edhe fjalën ‘turpshëm’?” Dhe më pas u drejtohet të gjithë gazetarëve të tjerë i irrituar, duke kërkuar konfirmim.
Lexo më tej: Taremi, bllokohet nga lufta në Iran: sulmuesi i Inter humb Kupën e Botës për Klube
Përkthyesi pranë tij megjithatë nënvizon: “‘Vergüenza’ mund të nënkuptojë edhe ‘siklet’.” Por Chivu i drejtohet të pranishmëve në sallë dhe pyet: “E tha, apo jo?” Disa e konfirmojnë dhe atëherë trajneri i Inter i përgjigjet drejtpërdrejt gazetarit. “Ne nuk turpërohemi kurrë për atë që bëjmë në fushë duke respektuar gjithmonë kundërshtarin, sepse kjo është mënyra jonë e të menduarit.” Chivu pra reagon menjëherë në mënyrë të prerë ndaj asaj që dëgjoi, ndonëse ndoshta gazetari nuk kishte synuar të thoshte pikërisht fjalën “turpshëm”.
Chivu, fjalët para mbylljes së konferencën për shtyp
Por kjo megjithatë ishte pika që i dha mundësi teknikut Chivu të sqarojë njëherë e mirë se ajo e Inter nuk duhet gjykuar si një ndeshje negative, dhe shpjegon: “Futbolli nuk është gjithmonë ajo që shkruhet në letër – shpjegon ai duke nënvizuar atë që thuhej në prag të ndeshjes, me zikaltrit favoritë për fitoren përfundimtare ndaj meksikanëve –. Ne e dhamë maksimumin, ishim proaktivë, të rrjedhshëm, pavarësisht energjive të pakta nga ana fizike, edhe pse nuk dua të gjej justifikime.” Në atë moment mbyllet konferenca për shtyp dhe Chivu nuk përgjigjet më në asnjë pyetje tjetër.
