Presidenti i Iranit ka deklaruar se nuk do të ketë bisedime për marrëveshjen bërthamore për sa kohë që vazhdojnë sulmet nga Izraeli. Presidenti Masoud Pezeshkian ka patur një bisedë telefonike me homologun e tij francez Emmanuel Macron. Ky i fundit i ka bërë thirrje për përmbajtje maksimale dhe shmangie të përshkallëzimit të situatës në Lindjen e Mesme.
Por, presidenti iranian Pezeshkian ka refuzuar mundësinë e çdo negociate për sa kohë që Izraeli vazhdon sulmet ndaj territorit iranian.
“Irani nuk do të ulet në asnjë tryezë negociatash ndërkohë që vendi ynë është nën sulm,” mësohet të ketë thënë Pezeshkian gjatë bisedës, sipas burimeve diplomatike iraniane.
Kjo bisedë vjen vetëm pak orë pasi u anulua zyrtarisht takimi i planifikuar për të dielën midis përfaqësuesve të SHBA-së dhe Iranit, i cili kishte për qëllim rifillimin e bisedimeve rreth marrëveshjes bërthamore.
