Presidenti amerikan, Donald Trump ka mbledhur kabinetin qeveritar në Shtëpinë e Bardhë pas sulmeve izraelite ndaj Iranit, raporton CNN.
Në një konferencë për shtyp dje, presidenti amerikan kishte thënë se “sulmi ishte i mundur”, por gjithashtu i kishte kërkuar Izraelit të mos e bënte atë. Disa orë para bastisjes, manjati kishte shkruar në Truth se ”Shtetet e Bashkuara mbeteshin të përkushtuara ndaj një zgjidhjeje diplomatike”.
Donald Trump, tha në një intervistë me Fox News se ai dinte paraprakisht për planet e Izraelit për të sulmuar Iranin, por përsëriti se SHBA-të nuk ishin të përfshira.
Uashingtoni, shtoi ai, kishte njoftuar të paktën një aleat kyç në Lindjen e Mesme se sulmi do të ndodhte. Trump theksoi se SHBA-të janë gati të mbrojnë veten dhe Izraelin në rast të një hakmarrjeje nga Irani.
“Unë gjithmonë shpresoj për negociata”, tha ai, duke shtuar se Irani “nuk mund ta ketë armën bërthamore”.
Përfshirja u mohua edhe nga Sekretari i Shtetit Marco Rubio, duke vënë në dukje se Izraeli i kishte “këshilluar” SHBA-të se besonte se “veprimi ishte i nevojshëm për vetëmbrojtje”.
“Sonte, Izraeli ndërmori veprime të njëanshme kundër Iranit. Ne nuk jemi të përfshirë në sulme kundër Iranit dhe përparësia jonë kryesore është mbrojtja e forcave amerikane në rajon. Izraeli na njoftoi se beson që ky veprim ishte i nevojshëm për vetëmbrojtjen e tij. Presidenti Trump dhe Administrata kanë ndërmarrë të gjitha hapat e nevojshëm për të mbrojtur forcat tona dhe mbeten në kontakt të ngushtë me partnerët tanë rajonalë. Më lejoni të jem i qartë: Irani nuk duhet të synojë interesat ose personelin e SHBA-së”, tha ai.
