Deputetët e Kosovës për të 30-ën herë do të mblidhen sot për konstituimin e Kuvendit. Partitë politike nuk ndryshojnë në qëndrimet e tyre, ndërsa procesi ka mbetur në zgjedhjen e kryetarit të Kuvendit. Lëvizja Vetëvendosje nuk po heq dorë nga emri i Albulena Haxhiut për kryetare të Kuvendit, ndërsa partitë tjera, PDK, LDK e AAK kanë ritheksuar se nuk do të votojnë Haxhiun për kryeparlamentare.
Kryesuesi i Kuvendit, Avni Dehari që disa herë radhazi po e vë në votim një Komision që do të mundësonte votim të fshehtë, por në mungesë kuorumi nuk po kalon. Çështjen e Komisionit, AAK e ka dërguar në Kushtetuese. Lidhur me ngërçin politik, mediat në Kosovë shkruajnë se nga Presidenca kanë bërë të ditur se ekipi ligjor i presidentes ka përgatitur një draft që do të mund të dërgohej në Kushtetuese.
“Sa i përket Gjykatës Kushtetuese, ekipi ligjor Presidentes ka përgatitur një draft të lëndës që do të mund të adresohej në Kushtetuese, mirëpo jemi në pritje të aktgjykimit të Gjykatës Kushtetuese rreth pranueshmërisë së kërkesës së dërguar nga AAK-ja, sepse kjo pastaj mund t’i sqarojë edhe çështjet e pranueshmërisë së një çështjeje që do të referohej nga Presidentja. Pra nuk është fjala për meritat e çështjes, por vetëm për anën procedurale, pra pranueshmërinë”, ka thënë Bekim Kupina, këshilltar për media i presidentes Osmani.
