Asociacioni i Gazetarëve të Shqipërisë ka reaguar pas një debati mes kryetares në detyrë të Bashkisë Tiranë, Anuela Ristani dhe ekipit të emisionit investigativ “Piranja”. Gjithçka erdhi pas një eposidot të emisionit ku trajtohej vënia e mjeteve në pronësi të Bashkisë Tiranë, në dispozicion të familjes Ristani, konkretisht një prej makinave që dërgon në punë zyrtaren dhe vajzën e saj. Ky fakt ka bërë që Ristani të përplaset me gazetarët deri në ofendime, pasi akuzon për përndjekje të fëmijës.
Asociacioni i Gazetarëve të Shqipërisë në ragimin publik, dënon gjuhën fyese të përdorur nga kryetarja në detyrë e Bashkisë Tiranë, dhe thekson se Ristani duhej t’u përgjigjej me transparencë pyetjeve të ngritura nga gazetarët dhe jo ti shantazhojë ata. Sa i përket akuzave për përndjekje të fëmijës, asocacioni shprehet se nuk duhet të përdoren si mburojë emocionale për të mbuluar abuzime me pushtetin dhe burimet publike.
Në deklaratë u bëhet thirrje institucioneve publike, veçanërisht drejtuesve të lartë, që të ruajnë etikën e komunikimit, të garantojnë transparencën dhe të ndalojnë sulmet personale dhe institucionale ndaj gazetarëve.
Asociacioni i Gazetarëve të Shqipërisë dënon me forcë gjuhën fyese, denigruese dhe përbuzëse të përdorur nga Kryetarja në detyrë e Bashkisë Tiranë, znj. Anuela Ristani, ndaj gazetarit Edon Kuqi dhe ekipit të emisionit investigativ “Piranja”. Termat si “legen”, "maniakë" “turpi i gazetarisë”, apo akuzat për “joprofesionalizëm” janë jo vetëm të papranueshme në fjalorin publik, por edhe të rrezikshme për klimën e lirisë së medias në Shqipëri. Znj. Ristani, në vend që t’u përgjigjej me transparencë pyetjeve legjitime të ngritura nga një investigim gazetaresk mbi përdorimin e resurseve publike, zgjodhi të shantazhojë verbalisht gazetarin dhe të përpiqet të viktimizohet në mënyrë që të shmangë thelbin e çështjes.
Po ashtu, ne theksojmë se pretendimet për “ndjekje të fëmijëve” nuk duhet të përdoren si mburojë emocionale për të mbuluar abuzime me pushtetin dhe burimet publike. Ne inkurajojmë çdo media të respektojë normat etike, por refuzojmë në mënyrë të prerë kriminalizimin e gazetarisë kritike dhe investiguese. U bëjmë thirrje institucioneve publike, veçanërisht drejtuesve të lartë, që të ruajnë etikën e komunikimit, të garantojnë transparencën dhe të ndalojnë sulmet personale dhe institucionale ndaj gazetarëve.
Shkelja e privatësisë për të mirën publike
Jeta private dhe familjare e politikanëve dhe zyrtarëve publikë nuk duhet të jetë objekt i raportimit mediatik, pasi kjo do të shkelte Nenin 8 të Konventës Evropiane për Mbrojtjen e të Drejtave të Njeriut dhe Lirive Themelore. Megjithatë, informacioni rreth jetës së tyre private mund të zbulohet nëse lidhet drejtpërdrejt me kryerjen e detyrave të tyre publike, pa u shkaktuar dëme të panevojshme palëve të treta (fëmijëve ose anëtarëve të tjerë të familjes).
Kur flitet për cenimin e privatësisë së politikanëve ose zyrtarëve publikë për hir të interesit publik, "interes publik" duhet të kuptohet si "veprime dhe/ose informacione që synojnë të ndihmojnë publikun të formojë opinione ose të marrë vendime në lidhje me çështje ose ngjarje të caktuara, duke përfshirë zbulimin e krimeve ose kundërvajtjeve, dhe për të parandaluar që publiku të mashtrohet nga deklaratat ose veprimet e individëve ose organizatave". Gazetarët dhe redaktorët duhet të vlerësojnë interesin publik rast pas rasti përpara se të zbulojnë informacione private.
Në mënyrë të ngjashme, kur politikanët ose figurat publike tërheqin vëmendjen ndaj disa aspekteve të jetës së tyre private, media ka të drejtë të raportojë për këtë dhe të informojë publikun. Në rastet kur njerëzit që janë nën vëzhgim vuajnë nga tragjedi personale, media duhet të tregojë konsideratë dhe t'i qaset çështjes me dhembshurinë dhe diskrecionin e duhur.
