Kurir Sport provokon me një shkrim të denjë për luftën e ftohtë, të publikuar sot në mbrëmje në faqen e tyre online. Një shkrim i ilustruar me foto në të cilat pretendohet se “spiunuan taktikat e kuqezinjve”.
“Po afrohet e shtuna dhe përballja mes Shqipërisë dhe Serbisë në kuadër të kualifikueseve për Kupën e Botës 2026… - shkruhet në hapje të shkrimit të Kurir -. Futbollistët e përfaqësueses vendase zhvilluan sot një stërvitje më të lehtë në Tiranë, e cila ishte e mbyllur për publikun, por gazetari ynë arriti të ndjekë një pjesë të asaj që po përgatisin për të shtunën. Stërvitja u zhvillua në fushën që ndodhet në kuadër të kompleksit të FSHF-së, dhe e gjithë kjo është pranë stadiumit “Air Albania” ku do të luhet ndeshja”.
Lexo më tej: Manaj stërvitet ende më vete, Sylvinho nis të shqetësohet për Serbinë
Pak gjëra në lidhje me spiunimin e pretenduar taktik, por më tepër tendencë për të provokuar me arritjen e bërë sipas tyre: “Trajneri Sylvinho mori pjesë aktive në stërvitje si lojtar dhe kujtoi ditët e tij të lavdishme, dhe duket se është i kënaqur me lojtarët e tij, gjë që mund të konkludohet nga thirrjet e shpeshta “bravo”.
Serbia do ta nisë garën në Grupin K të kualifikueseve për Kupën e Botës me ndeshjet kundër Shqipërisë (Tiranë, 7 qershor) dhe Andorrës (Leskovac, 10 qershor). Për Shqipërinë e teknikut Sylvinho kjo do të jetë ndeshja e tretë kualifikuese pas një humbje në debutim me Anglinë e suksesit pasues me Andorran.
