Kombëtarja shqiptare vijon përgatitjet për ndeshjet kualifikuese të Kupës së Botës 2026, por Rei Manaj vijon të mos jetë gati. Sulmuesi i Sivasspor, i cili kaloi një gjendje gripale, u stërvit veçmas në palestër. Koha shtrëngon dhe tani Sylvinho ka nisur të shqetësohet për gjendjen e lojtarit të tij. Nëse nuk vjen në formën e duhur për të shtunën, atëherë kundër Serbisë ofensiva do të udhëhiqet nga Mirlind Daku.
Ekipi i drejtuar nga trajneri brazilian u stërvit me intensitet të plotë pasditen e sotme në “Shtëpinë e Futbollit”. Sylvinho, duke përjashtuar këtu Manaj, kishte në dispozicion të gjithë grupin e lojtarëve. Manovrat taktike kanë qenë në plan të parë për kuqezinjtë, që kërkojnë të mos zhgënjejnë para publikut të tyre në ndeshjen që ka më shumë rëndësi.
Lexo më tej: Fitore me Serbinë e humbje me Letoninë? Hoxha gati të firmosë: "Pranoj"
Ditën e nesërme, ekipi do të zhvillojë stërvitjen e radhës, e cila do të jetë e hapur për mediat në 15 minutat e para. Natyrisht Sylvinho shpreson që Manaj të marrë pjesë, në të kundërt mbetet vetëm seanca zyrtare para ndeshjes dhe atëherë bëhet shumë e vështirë që 28 vjeçari që luan në kampionatin turk ta nisë nga fillimi ndeshjen.
