Policia e Tiranës ka vendosur në pranga dy persona pasi vodhën kasafortën me 15 000 euro,në një banesë, në rrugën “Muhamet Gjollesha” në Tiranë.
Njëri prej tyre, aktualisht është me masë sigurie “Arrest në shtëpi”, për veprën penale “Vjedhje". Sekuestrohet automjeti i dyshuar i përdorur nga autorët, për të realizuar vjedhjen.
Njoftimi i policisë:
Specialistët për Hetimin e Krimeve të Komisariatit të Policisë Nr. 2 në bashkëpunim me Drejtorinë Vendore të Policisë Vlorë, pas kallëzimit nga një shtetas, se i kishin vjedhur kasafortën me një shumë parash, në banesë, kanë organizuar dhe finalizuar operacionin policor të koduar "Reagimi", për zbardhjen e rastit.
Si rezultat i operacionit u identifikuan, u kapën dhe u vunë në pranga shtetasit:
A. Xh., 40 vjeç dhe L. Gj., 38 vjeç, të dy banues në Vlorë, të dënuar më parë për vjedhje. Nga verifikimet rezultoi se shtetasi A. Xh. ishte me masë sigurie “Arrest në shtëpi”, për veprën penale “Vjedhja”.
Nga hetimet e kryera gjatë operacionit dyshohet se këta shtetas, më datë 02.06.2025, kanë vjedhur një kasafortë me 15 000 euro, në një banesë në rrugën “Muhamet Gjollesha”. Materialet procedurale i kaluan Prokurorisë, për veprime të mëtejshme.
