Pas një takimi që zgjati rreth tre orë mes drejtuesve të Napolit dhe Antonio Conte, gjithçka është shtyrë për një datë të pacaktuar. Pas festimeve për fitimin e titullit të katërt kampion, me paradën me autobus të hapur që ngjyrosi qytetin, napolitanët do të duhet të qartësojnë të ardhmen e tyre, që do të varet nga zgjedhja e trajnerit. Megjithatë, një takim i vetëm nuk mjaftoi për të arritur një përgjigje përfundimtare dhe, në mënyrë befasuese, nuk erdhi përfundimi më i pritur.
Zërat më këmbëngulës e duan Conte në pankinën e Juventusit pas Tudor, por ende nuk është dhënë një përgjigje përfundimtare nga asnjëri prej protagonistëve kryesorë të kësaj çështjeje. Sipas asaj që përmbledh Sky, palët e përfshira kanë marrë kohë për të reflektuar më tej, por për momentin nuk ndihet një frymë ndarjeje, siç dukej disa ditë më parë.
Takimi mes Conte dhe De Laurentiis
Në mëngjes i gjithë Napoli ishte mbledhur në Vatikan për audiencën private me Papa Leone XIV, por më pas Conte qëndroi në Romë për të biseduar me presidentin De Laurentiis. Në shtëpinë e tij ishin të pranishëm edhe administratori i deleguar Maurizio Chiavelli dhe drejtori sportiv Giovanni Manna: takimi zgjati rreth tre orë dhe përfundoi rreth orës 17:00, por nuk solli asnjë përgjigje të qartë për të ardhmen e trajnerit, i cili ishte i shoqëruar edhe nga bashkëshortja e tij, Elisabetta.
Lexo më tej: De Laurentiis i jep lamtumirën teknikut Conte: “I uroj suksese, meriton respekt”
Nuk ka ndarje përfundimtare dhe ky është lajmi më i papritur për tifozët që besonin se do ta përshëndesnin trajnerin që sot, pas zërave të qarkulluar ditët e fundit. Si Conte ashtu edhe klubi kanë komunikuar pikëpamjet e tyre mbi sezonin dhe pritshmëritë për të ardhmen dhe janë ndarë duke marrë kohë për të reflektuar më tej. Në sfond, për Napolin mbetet emri i Massimiliano Allegri: ai është alternativa numër një, por ende nuk është vendosur asgjë dhe vullneti i përbashkët është që të reflektohet mbi nevojat e trajnerit dhe mbi kërkesat e ardhshme të klubit.
