Policia Kufitare e Vlorës dhe Roja Bregdetare i kanë ardhur në ndihmë disa udhëtarëve që lundronin me një velierë, jeta e të cilëve rrezikohej nga moti i keq dhe dallgët e larta.
Sipas njoftimit të policisë bëhet me dije se incidenti u regjistrua një ditë më parë rreth orës 19:20, rreth 3 milje në perëndim të Ishullit të Sazanit. Fatmirësisht të gjithë udhëtarët ndodhen në gjendje të mirë shëndetësore.
"Mbrëmjen e djeshme, rreth orës 19:20, DVKM Vlorë ka marrë njoftim se një tjetër veliere, që ndodhej rreth 3 milje në perëndim të Ishullit të Sazanit, kishte vështirësi në lundrim, për shkak të përkeqësimit të kushteve atmosferike dhe errësirës, dhe personat në bordin e saj po rrezikoheshin.
Menjëherë pas marrjes së njoftimit, u organizua ndërhyrja nga mjeti lundrues i Stacionit të Mjeteve Lundruese Triport, i cili u nis drejt koordinatave të raportuara.
Rreth orës 20:20, veliera u lokalizua dhe u shoqërua në mënyrë të sigurt në brendësi të Gjirit të Vlorës, ku ndaloi në zonën e “Bove”, pranë Plazhit të Vjetër. Nga komunikimi me ekuipazhin, rezultoi se shtetasit ndodheshin në gjendje të mirë shëndetësore. Policia Kufitare vijon të qëndrojë në gatishmëri të plotë, 24/7, në shërbim të qytetarëve dhe turistëve", informoi policia.
