Trajneri i Kombëtares shqiptare, Sylvinho, doli sot në konferencë për shtyp pas publikimit të listës me 27 lojtarët e thirrur për dy ndeshjet kualifikuese të Botërorit, më 7 qershor ndaj Serbisë dhe më 10 kundër Letonisë. Ai foli hapur për rëndësinë e sfidave, veçanërisht asaj ndaj Serbisë, si dhe për gjendjen e lojtarëve dhe pritshmëritë e tij.
Sylvinho për ndeshjen me Serbinë
“Ndeshja me Serbinë nuk është e zakonshme. E njoh historinë, por në fund është futboll dhe duhet të fokusohemi te loja,” u shpreh tekniku brazilian. “Kërkoj nga lojtarët që të japin zemrën dhe shpirtin në fushë, të mos humbim identitetin dhe të jemi skuadër që lufton me shpirt e zemër”.
Lexo më tej: Broja e Manaj “nën armë”: Sylvinho thërret dy nga Superiore kundër Serbisë & Letonisë
Trajneri theksoi se periudha e grumbullimit është shumë e veçantë për shkak të ndryshimeve në ngarkesën fizike të lojtarëve, pasi sezoni i klubeve ka përfunduar në kohë të ndryshme. “Disa lojtarë kanë qenë pushim për më shumë se 20 ditë. Duhet të përgatitemi mirë në këto pak ditë që kemi në dispozicion,” tha ai.
Asnjë risi
I pyetur për mungesën e disa emrave të rinj, Sylvinho u shpreh se është i kënaqur me grupin e përzgjedhur dhe se ndryshimet nuk mund të jenë të mëdha në çdo grumbullim. “Kemi ndjekur lojtarë të tjerë dhe kemi një listë me 15-20 emra që po monitorojmë, por këta 27 janë më të mirët për momentin,” tha trajneri.
Ai vlerësoi gjithashtu paraqitjet e mesfushorit Kristjan Asllani me Interin, duke thënë: “Jemi krenarë për të. Ka bërë një sezon shumë të mirë dhe është një shembull profesionalizmi”.
Shanset e kualifikimit
Në fund, Sylvinho komentoi edhe për shanset në grup, duke pranuar se Anglia është favoritja kryesore, por theksoi se Kombëtarja shqiptare do të luftojë për çdo pikë. “Në letër jemi për vendin e dytë, por në futboll gjithçka është e mundur. Duhet të përqendrohemi te forca jonë dhe të marrim maksimumin në këto dy ndeshje”.
