Procesi për vdekjen e Diego Armando Maradona është pezulluar për një javë, gjatë së cilës do të analizohen provat e mbledhura në kuadër të hetimit për të përcaktuar nëse ka arsye për përjashtimin e njërës prej gjykatëseve të trupit gjykues, Julieta Makintach, e akuzuar përanshmëri dhe për lejimin e dy dokumentaristëve të hyjnë në sallë pa autorizim për realizimin e një përmbajtjeje audiovizive.
Një situatë që i ka zënë të gjithë në befasi dhe që po shkakton shumë diskutime në Argjentinë. Procesi, i cili po zhvillohet në Gjykatën Penale të Tretë (TOC) të San Isidros, në periferi të Buenos Airesit, ka nisur më 11 mars 2025 dhe deri tani janë zhvilluar 19 seanca, ku kanë dëshmuar mbi 40 dëshmitarë, përfshirë tri vajzat e ish-futbollistit: Dalma, Gianinna dhe Jana Maradona.
Pse është pezulluar procesi për vdekjen e Maradonës
Arsyeja kryesore e pezullimit janë akuzat e ngritura ndaj Julieta Makintach, një gjykatëse e trupit gjykues që ka drejtuar debatin, e akuzuar nga avokatët mbrojtës të njërës prej të pandehurve, mjekut Leopoldo Luque, përanshmëri dhe për lejimin e hyrjes në sallë të dy dokumentaristëve pa autorizimin e palëve. Gjykatësja po hetohet për zhvillimin e bisedimeve me një kompani prodhimi audioviziv që është e interesuar për të xhiruar një dokumentar mbi çështjen Maradona.
Argumentet e akuzës lidhen me praninë e të paktën tre personave, të regjistruar në një video nga Gjykata e Lartë e Buenos Airesit gjatë seancës së parë të procesit. Në pamje shihet një person që merr një aparat fotografik refleks dhe fillon të filmojë: situata u raportua nga një police e caktuar për ruajtjen e sallës. Gjykatësja ka lidhje me shtëpinë e prodhimit Pegsa, pronë e ish-lojtarit të Los Pumas, Agustín Pichot, dhe e vëllait të tij, Juan Makintach. Dokumentari kishte tashmë një titull: “Gjykatësja e Zotit”.
“Gjykatësja e Zotit”
Avokatët Julio Rivas dhe Mara Digiuni kanë vërejtur se, gjatë debatit, “janë vërejtur qëndrime dhe pyetje që sugjerojnë përanshmëri në vlerësimin e provave, duke kompromentuar të drejtën për një proces të drejtë dhe të paanshëm”.
Sipas argumentimit të tyre, në pyetjet e drejtuara ndaj psikiatres Agustina Cosachov, Makintach ka treguar “një rol aktiv në ndërtimin e një hipoteze akuzuese, gjë që është e papërputhshme me paanshmërinë e nevojshme të gjykatësit”.
Dyshimet ndaj gjykatëses u shprehën për herë të parë të enjten e kaluar nga avokatët e Luque, kur paraqitën një kërkesë zyrtare për përjashtimin e saj, që u hodh menjëherë poshtë nga gjykata. Rivas dhe Digiuni, ashtu si edhe avokati i Cosachov, Vadim Mischanchuk, paraqitën më pas një ankim dhe erdhi pezullimi.
Kallëzimi penal
Paralelisht, avokatët Fernando Burlando dhe Mario Baudry, që përfaqësojnë tre nga fëmijët e ish-futbollistit, paraqitën të enjten e kaluar një kallëzim penal për të hetuar faktet e përmendura gjatë seancës, të cilat mund të përbëjnë një vepër penale.
Prokuroria ka theksuar “rëndësinë institucionale” të situatës dhe ka kërkuar një pezullim dhjetëditor për të shqyrtuar provat e mbledhura në hetimin e nisur pas kallëzimit të Burlandos dhe Baudry. Më pas, gjykata vendosi të reduktojë këtë afat në një javë.
Maradona, rrezikohet anulimi i procesit?
Pajtimi për rëndësinë e fakteve të denoncuara u tregua të martën, me mbështetjen e pesë paditësve dhe katër nga shtatë mbrojtjet që marrin pjesë në këtë proces, për kërkesën e pezullimit të paraqitur nga Prokuroria. Seanca do të rinisë të martën më 27 maj dhe të gjitha palët do të duhet të shprehen pro ose kundër përjashtimit të gjykatëses, mbi bazën e provave të mbledhura gjatë javës së hetimeve.
Atë ditë, gjykata mund të vendosë nëse do ta pranojë apo jo kërkesën për përjashtim dhe ta kalojë çështjen në Dhomën e Parë të Apelit dhe të Garancisë për çështje penale për një vendim: ose, siç ka njoftuar vetë Makintach të martën, mund të jetë ajo që vendos të tërhiqet vetë.
Lexo më tej: Maradona, zbulohet audio e bujshme: “Qëllimi është t’u hidhet faji familjarëve”
Avokati i Nancy Forlini (koordinatore mjekësore në Swiss Medical), Nicolás D’Albora, ka deklaruar se “nëse doktorresha Makintach do të hiqej, ky debat do të binte në tokë dhe do të duhej të shpallej i pavlefshëm”, ndërsa avokati Mischanchuk ka vlerësuar se “është i mundur një marrëveshje provash mes palëve”, që do t’i konsideronte të vlefshme dëshmitë e dhëna deri tani në gjykatë.
“Nëse një prej gjyqtarëve nuk do të jetë më i pranishëm, do të duhet të shohim nëse ka një gjykatës të ri të disponueshëm dhe të shohim se në cilën fazë procedurale mund të rifillojmë,” ka deklaruar Burlando, duke sqaruar se, megjithëse nuk do të ishte e nevojshme “të nisnim nga e para”, kjo do të nënkuptonte kthimin e procesit në fazat fillestare.
Giannina Maradona ka kërkuar që çështja të vazhdojë rrjedhën e saj: “Shpresoj të mund të dëshmohet se është gjithçka një gënjeshtër dhe që procesi të ecë përpara me sa më shumë transparencë të jetë e mundur.”
