Carlo Ancelotti u emërua trajner i Brazilit vetëm disa ditë më parë, por duhet të përballet menjëherë me një çështje shumë serioze brenda CBF-së (Konfederata Braziliane e Futbollit): presidenti Ednaldo Rodrigues është shkarkuar nga Gjykata e Lartë Federale dhe së shpejti do të ketë zgjedhje të reja.
Nuk nis në mënyrën më të mirë aventura e Carletto si përzgjedhës i Seleçaos, por Rodrigues duhej të përgjigjej për disa akuza të ngritura ndaj tij prej muajsh dhe që i kushtuan këtë masë nga drejtësia.
Presidenti i CBF-së shkarkohet nga detyra
Në një vendim që tronditi thellësisht botën e futbollit brazilian, Gjykata e Drejtësisë së Rio de Janeiros (STJ), e kryesuar nga gjyqtari Gabriel Zefeiro, anuloi një marrëveshje të nënshkruar në janar që i kishte garantuar Rodrigues-it postin e tij, duke kundërshtuar firma të dyshimta dhe falsifikime të mundshme. Fjalët e gjyqtarit ishin të qarta: “Shpall të pavlefshme marrëveshjen e nënshkruar mes palëve”, duke urdhëruar Rodrigues dhe stafin e tij të lënë menjëherë detyrën.
Lexo më tej: Ancelotti, një mbret në Brazil: pagë maksimale, bonus për Botërorin dhe… avion privat
Fernando Sarney, nënkryetar i federatës, me kërkesë të gjykatës, do të marrë postin përkohësisht deri në shpalljen e zgjedhjeve, që parashikohen të paktën për në mesin e qershorit. Për herë të dytë që nga marrja e detyrës, Ednaldo Rodrigues detyrohet të largohet nga posti i presidentit të CBF: ishte rizgjedhur njëzëri në mars për mandatin 2026–2030, por në vitin 2023 u largua përkohësisht pasi një gjykatë kishte anuluar rezultatet zgjedhore që e kishin sjellë në krye të federatës.
Ancelotti rrezikon pankinën?
Shkarkimi i Ednaldo Rodrigues vë menjëherë në dyshim vazhdimësinë e Ancelotti-t në krye të Brazilit. Opozita brenda institucionit e ka konsideruar se emërimi zyrtar i trajnerit italian ishte i nxituar, duke supozuar se bëhej fjalë për një masë kundër-presioni në dritën e rëndësisë së akuzave ndaj Rodrigues. CBF, sipas disa mediave, kishte përgatitur një plan emergjence ligjore për të garantuar që ish-trajneri i Real Madrid të mbetej në detyrë nëse Ednaldo do të shkarkohej përfundimisht, siç ndodhi. Në ditët në vijim do të kuptojmë më shumë.
Rodrigues: “Ancelotti te Brazili, më shumë se lëvizje strategjike”
Disa ditë më parë vetë Rodrigues kishte shpallur kështu zgjedhjen për t’i besuar pankinën e Brazilit italianit ish-Real: “Të sjellësh Carlo Ancelotti në krye të Brazilit është më shumë se një lëvizje strategjike. Është një deklaratë për botën që jemi të vendosur të rikthehemi në vendin më të lartë të podiumit. Ai është trajneri më i madh në histori dhe tani është në krye të kombëtares më të madhe të planetit. Së bashku do të shkruajmë kapituj të rinj të lavdishëm të futbollit brazilian”.
