Në ndeshjen e luajtur të shtunën, më 10 maj, mes Atletico Madrid dhe Real Sociedad, Alexander Sorloth ka rishkruar historinë e La Liga, duke shënuar tripletën më të shpejtë ndonjëherë: 29-vjeçari norvegjez ka pasur nevojë për vetëm 10 minuta e 46 sekonda për të shënuar tre golat e tij, një arritje pa precedent në kampionatin iberik, duke qenë se rekordi i mëparshëm ishte vendosur nga Mundo, një lojtar i Valencias në vitet ’40, i cili kishte shënuar një tripletë në minutën e 15-të të një ndeshjeje kampionati. Jo më kot, për Cholo Simeonen, që e ka dashur në Atletico, ai është “Sicario”.
Sorloth mes goleadorëve të mëdhenj të shekullit XXI
Natyrisht, Sorloth e mori skenën e mbrëmjes së Colchoneros duke e marrë topin në shtëpi, por edhe duke u konfirmuar si një bomber i vërtetë edhe për futbollin modern, duke qenë se askush nuk kishte arritur të afrohej me rekordin që kishte rezistuar për më shumë se 80 vite në La Liga. Para tij kishin provuar sulmues të kalibrit të Kevin Gameiro (po me Atlético Madrid, në vitin 2017) dhe David Villa (me Valencian, në vitin 2008), por askush nuk kishte mundur: tani ishte ai që, për vetëm 11 minuta, i ka lënë të gjithë prapa.
Sorloth dhe tripleta rekord: klas, forcë dhe fat
Ai e bëri këtë me klas, elegancë dhe cilësi: goli i parë ishte një goditje e vështirë dhe e lartë pas një krosimi nga e djathta, ndërsa i dyti ishte një goditje perfekte me të majtën nga kufiri i zonës. Së fundi, vula e tretë, më pak estetike por po aq e përsosur për të hyrë në histori, duke përfituar nga një krosim i grushtuar keq nga mbrojtja kundërshtare. Pas gjysmë ore lojë, norvegjezi e përfundoi veprën e tij personale me golin e katërt për pokerin e Atleticos, këtë herë me një goditje të fuqishme pas një krosimi nga e majta. Kjo është katërgolëshi i dytë në karrierë për Alexander Sorloth, aktualisht i katërti në La Liga me 17 gola, pas Lewandowski (25), Mbappé (24) dhe Budimir (18).
Sorloth, rezerva me përqindje prej kampioni
Zgjedhur nga Atlético Madrid për të plotësuar repartin ofensiv ku përfshihen edhe Álvarez, Griezmann, Correa, Samuel Lino dhe Giuliano Simeone, ai qartësisht nuk ka mundur të jetë protagonist absolut i skuadrës së Cholos. Por çështja është se ai arrin të jetë vendimtar pikërisht në këtë rol të aktorit të dytë luksoz, duke pasur përqindje të rëndësishme në bazë të minutave të luajtura. Aq sa vetë Cholo i ka vënë pseudonimin “Sicario”. Ai është, në fakt, një nga bomberët më vendimtarë të Europës kur futet nga stoli, pa shkëlqyer ndonjëherë te ekipet e mëdha.
Pas fillimeve shumë të mira në Norvegji, fillimisht te Rosenborg dhe më pas te Bodo/Glimt, ai u përpoq të afirmohej fillimisht në Eredivisie me Groningen dhe më pas në Premier League me Crystal Palace, por dështoi. U rilind te Midtjylland, më pas te Gent dhe në fund te Trabzonspor, ku sulmuesi norvegjez përjetoi sezonin e tij si hero, duke shënuar 33 gola në 41 ndeshje. Më pas, sërish errësira, deri te thirrja nga Atletico dhe nata që e shenjtëroi përgjithmonë në historinë e La Liga.
