Shefi i NATO-s, Mark Rutte, u ka propozuar anëtarëve të aleancës të rrisin shpenzimet e mbrojtjes në 3.5% të PBB-së dhe të shpenzojnë 1.5% të tjera për artikuj të tjerë që lidhen me mbrojtjen, për të përmbushur kërkesën e Donald Trump për një objektiv prej 5%.
Propozimi i Rutte mund t’i lejojë presidentit amerikan të shpallë një fitore në një samit të NATO-s në Hagë në qershor, ndërkohë që nuk i angazhon vendet evropiane dhe Kanadanë për një premtim prej 5% për shpenzimet thelbësore të mbrojtjes, të cilin shumë e shohin si të paqëndrueshëm politikisht dhe ekonomikisht.
Presidenti i SHBA-së, Donald Trump, dëshiron që anëtarët e NATO-s të shpenzojnë 5 përqind të PBB-së për mbrojtje - më shumë se dyfishi i objektivit aktual të shpenzimeve të aleancës. Kjo ka shkaktuar shqetësim midis qeverive të Evropës që kanë vështirësi financiare.
Italia do të shpenzojë 1.57 përqind të PBB-së për mbrojtje këtë vit dhe synon të arrijë 2 përqind në vitin 2028. Por Trump dëshiron më shumë para. Një objektiv prej 5 përqind është më shumë sesa çdo anëtar i NATO-s shpenzon aktualisht. SHBA-të vitin e kaluar shpenzuan 3.4 përqind të PBB-së së tyre për mbrojtje; Polonia i afrohet më shumë kësaj, duke shpenzuar 4.12 përqind në vitin 2024, dhe synon ta rrisë këtë përqindje në 4.7 përqind këtë vit.
Shpenzimet kanë tendencë të jenë më të larta sa më afër që është një vend me Rusinë, dhe tre vendet baltike po i rrisin ndjeshëm buxhetet e tyre ushtarake. Suedia, e cila vitin e kaluar shpenzoi 2.1 përqind të PBB-së për mbrojtje, gjithashtu mendon se është një ide e mirë të shpenzojë më shumë. Por shumë vende evropiane po përballen me vështirësi buxhetore dhe po përpiqen të arrijnë edhe objektivin prej 2 përqind. Gjermania po përpiqet të gjejë një mënyrë për të arritur përsëri në 2 përqind këtë vit.
