Këshilltari për Sigurinë Kombëtare të SHBA-së, Mike Waltz, do të lërë postin e tij dhe do të nominohet për të shërbyer si ambasador në Kombet e Bashkuara. Lajmin e dhanë fillimisht mediat amerikane dhe më pas e konfirmoi edhe Presidenti Donald Trump.
Waltz ishte ai që krijoi grupin e në aplikacionin “Signal”, në të cilin u fut gabimisht edhe një gazetar i cili ishte i pranishëm aty ku zyrtarët më të lartë të administratës amerikane planifikonin sulmet ushtarake në Jemen.
Përfaqësuesit e Trump minimizuan më herët ngjarjen duke u shprehur se nuk kishte pasur kërcënim të sigurisë duke nënvizuar se nuk u shpërnda asnjë material i klasifikuar në atë bisedë. Shtëpia e Bardhë, duket se priti që zhurma e atij që i konsiderua si “Signalgate” të qetësohej para se të ndërmerrte veprime.
LEXO EDHE: Skandali i SMS-ve/ Njerëzit e Trump: E urrej të shpëtojmë përsëri Europën. Parazitë!
Ky veprim vjen në të njëjtën javë që Trump feston 100 ditët e tij të para në detyrë. Në njoftimin e tij Presidenti Trump shkroi se Mike Waltz nuk do të jetë më këshilltari i tij i sigurisë kombëtare.
“Jam i kënaqur të njoftoj se do ta nominoj Mike Waltz për të qenë Ambasadorin e ardhshëm të Shteteve të Bashkuara në Kombet e Bashkuara. Që nga koha e tij në uniformë në fushën e betejës, në Kongres dhe, si Këshilltari im i Sigurisë Kombëtare, Mike Waltz ka punuar shumë për të vënë interesat e kombit tonë në radhë të parë.
LEXO EDHE: Del biseda e plotë/ Ç’thanë zyrtarët e SHBA për sulmin në Jemen dhe talljet për BE
E di që ai do të bëjë të njëjtën gjë në rolin e tij të ri. Ndërkohë, Sekretari i Shtetit Marco Rubio do të shërbejë si Këshilltar i Sigurisë Kombëtare, ndërsa do të vazhdojë udhëheqjen e tij të fortë në Departamentin e Shtetit. Së bashku, ne do të vazhdojmë të luftojmë pa u lodhur për ta bërë Amerikën dhe Botën PËRSËRI TË SIGURTË. Faleminderit për vëmendjen tuaj ndaj kësaj çështjeje!" – shkroi Trump. ©LAPSI.al
