Është hedhur në ambientet e “Shtëpisë së Futbollit” shorti i fazës “Final 4” në kampionatin “Abissnet Superiore”, teksa përballë janë vendosur Egnatia – Partizani dhe Vllaznia – Dinamo City.
Vllaznia e Dinamo të kënaqur nga shorti
Ndeshja e parë gjysmëfinale, Vllaznia – Dinamo City, do të luhet të dielën, më 4 maj, në orën 20:00. Tekniku i kuqebluve Thomas Brdaric është i bindur se do të jetë një ndeshje krejt ndryshe nga ajo e kampionatit apo Kupës. “Pas dy dekadash mungesë të titullit në Shkodër, është e rëndësishme që të fitojmë. Ne shkojmë për të fituar dhe jo për barazimin. Nuk mund ta menaxhosh barazimin, në sezonin e fundit në u përballëm me Egnatian dhe për mua ishte një ndeshje e mirë, por e dimë që këtë vit kemi avantazh dhe duam ti kemi në anën tonë. Ne kemi një grup shumë të mirë, aftësi, forcë dhe ne duam ti tregojmë këto cilësi në ndeshjen kundër Dinamos në gjysmëfinale dhe jemi të bindur që shkojmë në finale”, tha Brdaric pas shortit.
Duket i kënaqur nga goglat drejtori sportiv i Dinamos Ermal Barushi: “Shorti i mirë, kemi bërë ndeshje të mira me Vllazninë gjatë kampionatit, shpresoj që tja dalim. Kemi bërë një edicion të mirë deri tani, jemi pjesmarrës në Kupat e Europës prej disa vitesh kemi dhe fazën tjetër dhe duam të fitojmë titullin kampionat. U hodh dhe shorti i vogël për datën, ne do të luajmë në datë 4, shpresoj që tja dalim. Ekipi është në stërvitje, presidenti ka pasur arsye personale që nuk është këtu”, deklaroi ai.
Partizani e priste, Gega gati për sfidën
Ndërsa gjysmëfinalja e dytë, Egnatia – Partizani do të zhvillohet të hënën, më 5 maj, në orën 20:00. Të kuqtë duket se e prisnin që shorti do të ishte i vështirë e, në fakt, Skënder Gega nuk është dukur i surprizuar nga përplasja me Egnatian: “E pashmangshme, besoj Final Four duhet ta shijojmë, klubi ka ardhur në pikësynimet e veta. Do gëzojmë në çdo mënyrë, edhe të ishte me Vllazninë dhe Dinamon. Deri me datë 5 kemi ditë ekstra për të punuar. Të bëjmë më të mirën, në fund të fitojë futbolli. Egnatia është skuadra më e fortë, por në Final Four tjetër qasje. Ardhja në Final Four na ka dhënë qetësi, por dhe besim. Është në “Arena Kombëtare” me mbështetjen e tifozëve, nuk ka shumë gjëra për të thënë”.
Lexo më tej: Verdiktet finale: Tirana në playout e Partizani në Final 4, bien Skënderbeu e Laçi
Zëdhënësi i rrogozhinasve, Xhevdet Zekaj, është munduar të ruajë balancat: “Ne vlerësojmë realisht Partizanin, ka një trajner shumë të mirë, ka peshë dhe fanella e vet, por ne shkojmë që të bëjmë atë që Egnatia di të bëjë më mirë, të luajë denjësisht, sa më mirë dhe objektiv fitimin e titullit kampion”, tha ai.
Kalimi në finale përcaktohet në 90 minuta. Ekipet fituese kalojnë në finalen për titullin kampion. Në rast barazimi në gjysmëfinale, në finale kualifikohet ekipi i renditur në vendin e parë/dytë, në këtë rast Egnatia dhe Vllaznia. Të gjitha ndeshjet e fazës “Final 4” do të luhen në stadiumin “Arena Kombëtare”.
