Spanja dhe Portugalia humbën energjinë elektrike sot në një ndërprerje masive, sipas operatorit spanjoll të rrjetit elektrik.
Ndërprerje u raportuan nga Madridi në Lisbonë, me pjesën më të madhe të Gadishullit Iberik pa energji elektrike që nga e hëna, ndërkohë që autoritetet po hetojnë mundësinë e një sulmi kibernetik.
Në një deklaratë në X, operatori spanjoll i sistemit të transmetimit Red Eléctrica, që menaxhon rrjedhën e energjisë elektrike në nivel kombëtar, tha se protokollet ishin aktivizuar për të "rikthyer furnizimin me energji elektrike në bashkëpunim me kompanitë e sektorit pas ndërprerjes që ndodhi në sistemin e gadishullit."
"Shkaqet po analizohen, dhe të gjitha burimet janë duke u përkushtuar për ta zgjidhur," tha operatori.
Sipas gazetës Expresso, operatori portugez E-Redes tha se ndërprerja ndodhi për shkak të një "problemi në rrjetin elektrik evropian." Operatorët portugezë të rrjetit shtuan se të dhënat e mbledhura pas ndërprerjes sugjerojnë se një çekuilibër i tensionit ishte përgjegjës për rënien e sistemit.
Spanja dhe Portugalia kanë një rrjet energjetik shumë të integruar që funksionon si një ishull energjie dhe është i lidhur me pjesën tjetër të Evropës përmes një numri të vogël interkoneksionesh ndërkufitare me Francën.
Semaforët u fikën dhe sistemet e metrosë u ndalën në mbarë Spanjën dhe Portugalinë pasi rrjedha e energjisë elektrike u ndërpre në mënyrë të papritur rreth orës 12:30 të drekës. Megjithëse spitalet në të dy vendet janë të pajisura me gjeneratorë, autoritetet treguan se stafit iu kërkua të fiknin kompjuterët dhe të merrnin masa të tjera për të kursyer energjinë, pasi nuk dihet sa mund të zgjasë ndërprerja.
"Është ngritur një komitet krize për të menaxhuar situatën [në Spanjë]. Në këtë fazë ende nuk ka prova lidhur me shkakun e ndërprerjes masive. Një sulm kibernetik nuk është përjashtuar dhe hetimet janë duke vazhduar," tha një zyrtar që u informua mbi situatën në Spanjë.
Komisioni Evropian ka kërkuar prej vitesh integrim më të madh të sistemeve energjetike të vendeve, por ndërsa Madridi, Lisbona dhe Parisi vazhdimisht kanë sinjalizuar vullnetin e tyre për të ecur përpara me këtë plan, përparimi ka qenë i ngadaltë.
Ndërkohë që autoritetet po hetojnë mundësinë e një sulmi kibernetik, ndërprerjet e mëdha në të kaluarën janë shkaktuar edhe nga probleme të vogla në elemente të rrjetit evropian. Në vitin 2003, e gjithë Italia mbeti pa energji elektrike pasi një linjë energjie në Zvicër u ndërpre nga një pemë.
Autoritetet spanjolle u kërkuan banorëve të mos telefononin shërbimet e emergjencës për informacion, duke paralajmëruar se qendrat telefonike tashmë ishin mbingarkuar me telefonata.
©LAPSI.AL
