Një javë e mbetur e gjithçka e hapur për dy vendet e para dhe vetë prezencën në Final 4 me një ndeshje direkte si gjykatësi më i mirë i mundshëm për meritokracinë. Egnatia përtej faktit që ka vetëm një fitore në 5 ndeshjet e fundit, kryeson me 59 pikë, +3 nga Vllaznia ndjekëse. Rrogozhinasve i mjafton një pikë në ndeshjen e fundit përballë Teutës së shpëtuar tashmë për të rrëmbyer 100 milionët e bonusit e për të mos u marrë me rezultatet e tjera.
Humbja do ta komplikonte punën sepse Vllaznia e rrogozhinasit janë të barabartë në përplasjet e këtij sezoni dhe në golavarazhin e përgjithshëm skuadra e Tetovës ka vetëm tre gola avantazh. Kjo do të thotë se do të ketë rëndësi me çfarë rezultati humbet Egnatia e me çfarë shifrash fitojnë shkodranët. Sidoqoftë, Brdaric më shumë se të shpresojë te humbja e kryesuesve, duhet të kujdeset të mbajë pas Dinamon, që ka vetëm një pikë më pak. Nëndetsja ka përpara derbin me Tiranën, por në rast fitore, e kombinuar me humbjen e kuqebluve në Loro Borici me Lacin e vendit të fundit, por ende me shpresë, atëherë vendi i dytë do të ishte i Vllaznisë.
Lexo më tej: Egnatia arrin finalen e tretë radhazi të Kupës: përmbyset Partizani, Gega pa fjalë
Në rast se skuadrat barazohen me pikë, atëherë avantazhi do të ishte i Dinamos që ka dy fitore, një barazim e një humbje në katër përplasjet direkte në kampionat. Pa asnjë alternativë vec fitores është ndërkohë Partizani, që në javën e fundit të sezonit të rregullt luan gjithcka për gjithcka me Elbasanin. Dy skuadrat janë me 50 pikë dhe verdheblutë kanë favorin e ndeshjeve direkte, kështu që barazimi në kryeqytet do të mbante verdheblutë e Gvozdenovic në vendin e katërt. Gega duhet vetëm të fitojë, në të kundërt lamtumirë titull dhe ëndërra europiani mbetet vetëm te Kupa.
