Në gjysmëfinalen e kthimit të Kupës së Italisë, Milan mposhti Inter me rezultatin 3-0 dhe u bë finalisti i parë i kompeticionit. Pas barazimit 1-1 në ndeshjen e parë, zikaltërit e nisën fort në “San Siro”, me mbështetjen e publikut, por pas traversës së Dimarco (22’) dhe një rasti të humbur nga Lautaro, ishin kuqezinjtë që kaluan në avantazh me një goditje të saktë me kokë të Jovic në minutën e 36', që mposhti portierin Martinez. Në fillim të pjesës së dytë, serbi realizoi dygolëshin personal (50’), duke përfituar nga një rrëmujë në zonë pas një goditjeje nga këndi nga e djathta dhe një devijimi të Barella. Në minutën e 85', ishte Reijnders që vulosi ndeshjen me golin e tretë. Kuqezinjtë tani presin të mësojnë emrin e kundërshtarit në finalen e Romës më 14 maj, ku Bologna është favorite pas fitores 3-0 në ndeshjen e parë ndaj Empolit.
Milan, mallkimi i zikaltërve
Këtë sezon, Milan konfirmohet si “mallkimi” i Inter, duke i eliminuar “kushërinjtë” nga Kupa e Italisë dhe duke siguruar finalen, ku me shumë gjasa do të përballet me Bolognën (që luan nesër ndaj Empolit). Pas barazimit 1-1 në takimin e parë, kuqezinjtë triumfuan 3-0 në sfidën e dytë falë dygolëshit të Jovic (nga një gol për çdo pjesë), në një formë të shkëlqyer, dhe golit të tretë të shënuar në fund nga Reijnders. Për Inter shuhen përfundimisht shpresat për tripletë, ndërsa për Milan kjo fitore, edhe pse nuk mjafton për të shpëtuar sezonin, së paku zbut disi javët e fundit të vështira.
Lexo më tej: Igli Tare, marrëveshje totale me Milan: Drejtori i ri Sportiv prezantohet pas Pashkës
Asllani pa gjurmë, si i gjithë Interi
Ishte një Milan cinik, që përfitoi maksimalisht nga faza ofensive dhe gjeti golin që në rastin e parë të vërtetë (36’). Më parë, ishte Inter që dominoi me dy raste të mëdha: një traversë nga Dimarco dhe një gabim i madh i Lautaro nga një pozicion shumë i favorshëm. Asllani luajti titullar, por nuk la asnjë gjurmë si gjithë skuadra zikaltër. Në fillim të pjesës së dytë (50’), erdhi dyfishimi i Milan, që i dha më shumë besim skuadrës dhe ruajti ekuilibrin përballë sulmeve të pritshme të Inter. As Calhanoglu që mori vendin e mesfushorit të kombëtare shqiptare nuk bëri dot asgjë dhe në minutën e 85', goli i Reijnders mbylli përfundimisht çdo shpresë për rikthim nga ana e zikaltërve. Pesë derbi këtë sezon: tre fitore për Milan dhe dy barazime. Një makth i vërtetë për Simone Inzaghi dhe djemtë e tij.
