Java e 32-të e Premier League nis me fitoren në shtëpi të Manchester City, që rikthehet kështu në garën e plotë për një vend në Ligën e Kampionëve sezonin e ardhshëm. Skuadra e Guardiolës mposhti 5-2 Crystal Palace, në një ndeshje të mbushur me emocione. “Eagles” ndërtuan një avantazh prej dy golash me Eze dhe Richards, por më pas u shembën përballë furisë së De Bruyne (gol nga goditja e dënimit dhe asist), Marmoush, Kovacic, McAtee (asist nga Ederson) dhe O’Reilly.
MANCHESTER CITY–CRYSTAL PALACE 5-2
Ndeshja nisi keq për “Sky Blues”, pasi në minutën e 8' Eze realizoi golin e avantazhit për miqtë: anglezi shënoi për 0-1 pas një asisti nga Sarr, duke qëndruar në kufijtë e pozicionit jashtë loje, duke shënuar kështu debutimin e sistemit të ri të ofsajdit gjysmë-automatik në Premier League. Pas katër minutash, një dopio pritje e shkëlqyer nga Dean Henderson i mohoi barazimin fillimisht Marmoush dhe më pas De Bruyne, ndërsa Palace e çoi rezultatin në 2-0 në minutën e 21'. Ishte Richards ai që dyfishoi, në rikthimin e tij nga një dëmtim, duke mposhtur Edersonin me kokë pas një goditjeje këndi të ekzekutuar nga Wharton. De Bruyne goditi më pas shtyllën në anën tjetër, përpara një goli të anuluar për pozicion jashtë loje të Eze në minutën e 30'.
Lexo më tej: De Bruyne, lamtumirë Manchester City: do të luajë në skuadrën e qytetit që s'ekziston
Në minutën e 33' City rikthehet në lojë dhe ngushton në 2-1, falë një goditjeje të përkryer dënimi nga De Bruyne: belgu shpërthen me një ulërimë të fortë, në përpjekje për të zgjuar shokët e ekipit. Mision i përmbushur, pasi vetëm tre minuta më vonë, në të 36', barazon Marmoush dhe Kovacic përmbys rezultatin me golin e 3-2 në minutën e 47' (pikërisht pas një asisti të De Bruyne). Vendasit e çojnë rezultatin në 4-2 me McAtee në minutën e 56', pas asistit të tretë sezonal të Ederson, i cili më pas lë fushën 20 minuta para fundit për shkak dëmtimi. Në minutën e 79' vjen edhe goli i parë në Premier League për O’Reilly, me ndihmën e një devijimi të kundërshtarit, për rezultatin përfundimtar 5-2.
City kthehet kështu te fitorja dhe ngjitet në kuotën e 55 pikëve në renditje. Palace mbetet me 43 pikë, por gjithsesi protagonist i një sezoni shumë pozitiv deri tani.
