Lufta tregtare mes dy ekonomive më të mëdha në botë është rikthyer me intensitet, duke shënuar një fazë të re përplasjesh, kërcënimesh dhe paqartësie globale. Presidenti amerikan Donald Trump ka paralajmëruar thuajse dyfishim të tarifave ndaj Kinës, ndërsa Pekini është zotuar të "luftojë deri në fund".
Nëse masat hyjnë në fuqi që këtë të mërkurë, shumica e importeve kineze në SHBA do të përballen me një tarifë të frikshme prej 104%. Ky është një përshkallëzim i paparë në marrëdhëniet tregtare mes dy superfuqive.
Lexo më tej: “Trump vendos tarifa”/ Si ta kuptojmë vendimin epokal të Presidentit amerikan
Lista e produkteve kineze që preken nga tarifat amerikane përfshin smartfonë, kompjuterë, bateri, lodra dhe pajisje elektronike, por edhe mallra më të zakonshme si vida apo kaldaja. Me afatin që afrohet për vendosjen e tarifave në Uashington, pyetja është: kush do të tërhiqet i pari?
“Do të ishte gabim të mendosh se Kina do të tërhiqet dhe të heqë tarifat në mënyrë të njëanshme,” tha Alfredo Montufar-Helu nga The Conference Board.
“Jo vetëm që do ta bënte Kinën të dukej e dobët, por gjithashtu do t’i jepte përparësi SHBA-së për të kërkuar më shumë. Tani kemi arritur një ngërç që ka shumë gjasa të çojë në dhimbje ekonomike afatgjatë.”
Që nga java e kaluar, tregjet globale kanë përjetuar lëkundje të forta. Aksionet aziatike u tronditën të hënën, ndërsa Kina u kundërpërgjigj me tarifa të reja prej 34%. Trump paralajmëroi se nëse Pekini nuk tërhiqet, ai do të vendosë një tarifë shtesë prej 50%.
Tarifat e reja, që pritet të shkojnë mbi 40%, do të prekin edhe vende të tjera aziatike si Vietnami dhe Kamboxhia. Ekspertët paralajmërojnë për ritmin marramendës të zhvillimeve dhe mungesën e kohës për përshtatje të bizneseve dhe investitorëve, shkruan BBC.
Përballë presionit, Kina ka aktivizuar një sërë masash: ka lejuar dobësimin e juanit për të rritur konkurrueshmërinë e eksporteve dhe ndërmarrje shtetërore kanë filluar blerje aksionesh për të stabilizuar tregun.
“Ajo që po shohim është një lojë se kush e përballon më shumë dhimbjen. Nuk po flitet më për përfitime,” tha Mary Lovely nga Instituti Peterson për BBC.
“Kina mund të jetë shumë e gatshme ta përballojë dhimbjen për të shmangur përuljen ndaj asaj që ajo e sheh si agresion amerikan.”
Sipas Zyrës së Përfaqësuesit Tregtar të SHBA-së, vetëm në vitin 2024 u importuan 438 miliardë dollarë mallra nga Kina, ndërsa eksportet ishin 143 miliardë dollarë, një deficit prej 295 miliardë dollarësh.
“Ti mund të vendosësh tarifa deri në një farë mase dhe për një farë kohe. Por ka mënyra të tjera që të dy vendet të godasin njëra-tjetrën. Mund të thuash që nuk mund të përkeqësohet më shumë, por ka shumë mënyra që mundet,” tha Deborah Elms nga Hinrich Foundation në Singapor.
Lexo më tej: Trump po ndëshkon botën për suksesin e saj, Amerikën për dështimet e veta
Trump nuk ka folur ende me Xi Jinping që prej rikthimit në Shtëpinë e Bardhë, edhe pse Pekini ka sinjalizuar gatishmërinë për bisedime. Por ekspertët janë të ndarë.
“Mendoj se SHBA po e tepron me besimin që ka në vetvete,” tha Elms.
“Si do të përfundojë kjo? Askush nuk e di. Jam vërtet e shqetësuar për shpejtësinë dhe përshkallëzimin. E ardhmja është shumë më e vështirë dhe rreziqet janë tepër të mëdha.”
©LAPSI.AL
