Ish-ylli i futbollit izraelit, Yossi Benayoun, ka qenë viktimë e një sulmi pranë shtëpisë së tij në veri të Tel Avivit: një granatë është hedhur dhe ka shpërthyer duke shkaktuar dëme të mëdha materiale në banesë, edhe pse fatmirësisht nuk ka pasur të lënduar. Policia ka nisur menjëherë hetimet për të kuptuar nëse bëhet fjalë për një akt terrorist apo kriminal dhe nëse objektivi i këtij sulmi ishte vetë ish-futbollisti. “Jam i bindur që ka qenë një gabim”, ka deklaruar Benayoun. “Fillimisht mendova se kishte shpërthyer një bombol gazi”.
Benayoun shënjestër në atentat: “Është hapur një hetim”
Një shpërthim i fortë, tym dhe flakë si pasojë e hedhjes së një granate në mes të natës: rreth orës 23:00 të së dielës, më 6 prill, në shtëpinë e ish-futbollistit Yossi Benayoun shpërtheu kaosi. Në vendngjarje mbërritën zjarrfikësit që arritën të vendosnin situatën nën kontroll dhe të shmangnin pasojat për personat që ndodheshin brenda banesës, përfshirë Benayoun-in dhe familjarët e tij. “Nuk ka pasur viktima”, konfirmuan autoritetet lokale. “Shpërthimi ka shkaktuar dëme materiale, ndërkohë që janë hapur hetimet për të zbardhur dinamikën dhe motivet e këtij sulmi”.
Çfarë ndodhi: granata e hedhur drejt shtëpisë së Benayoun
Gjithçka ndodhi papritur, kur nga një motor u hodh një mjet shpërthyes dhe autorët u larguan menjëherë pas aktit: “Në fillim mendova se kishte shpërthyer një bombol gazi”, tregoi Benayoun. “Thirrëm zjarrfikësit, por vetëm kur mbërriti policia dhe gjeti mbetjet e një granate kuptuam se çfarë kishte ndodhur vërtet. Jam i bindur që ka qenë një gabim”, vijoi 44-vjeçari. “Nuk kam asnjë dyshim që granata nuk kishte për objektiv shtëpinë time”.
Kush është Yossi Benayoun, ish-ylli i Liverpool?
Ndërkohë, hetimet janë në vazhdim për të zbuluar arsyet e këtij atentati, i cili mund të ketë qenë edhe thjesht kriminal, pa pasur lidhje direkte me familjen Benayoun. Deri më tani, nuk ka asnjë tregues që ish-kapiteni i Izraelit, rekordmeni i paraqitjeve me kombëtaren, të ketë qenë shënjestra e sulmit. Aktualisht, Benayoun është një drejtues i vlerësuar sportiv në federatën izraelite, duke përfituar nga përvoja e tij e madhe ndërkombëtare, e ndërtuar gjatë një karriere të shkëlqyer në Premier League, ku ka luajtur për West Ham, Chelsea (me të cilin fitoi Europa League) dhe Liverpool, me të cilin zhvilloi tre sezone, duke grumbulluar gati 200 paraqitje në kampionatin anglez.
