Elbasani ka arritur një triumf të çmuar në transfertë ndaj Egnatias, duke fituar me rezultatin 2-1 në një sfidë me shumë emocione dhe episode interesante. Verdheblutë e drejtuar nga Nevil Dede treguan pragmatizëm dhe efikasitet, duke shfrytëzuar në maksimum momentet kyçe të takimit dhe duke marrë tre pikë me vlera të mëdha në garën për një vend në Final Four.
[video width="658" height="360" mp4="https://cdnimpuls.com/lapsi.al/wp-content/uploads/2025/04/67f3f32375666.mp4"][/video]
Elbasani i çmendur: dy gola në dy minuta
Pjesa e parë foli për një përballje të balancuar, me të dyja skuadrat që patën mundësitë e tyre. Gjithsesi, fundi i saj solli dy goditje të shpejta nga miqtë, të cilët brenda pak minutave ndëshkuan vendasit. Në fillim ishte Xhoel që shfrytëzoi një harkim nga e djathta dhe me një goditje të saktë me kokë kaloi Elbasanin në avantazh në minutën e 43'. Vetëm dy minuta më pas, Tsague finalizoi një aksion të shpejtë të verdhebluve, duke i çuar shifrat në 2-0 dhe duke i dhënë një goditje të rëndë Egnatias para pushimit.
Lexo më tej: Tirana fiton derbin dhe shpresën: Jarmouni e Ernest i rrezikojnë Final 4 Partizanit
[video width="666" height="360" mp4="https://cdnimpuls.com/lapsi.al/wp-content/uploads/2025/04/67f3f43820570.mp4"][/video]
'Panenka' e Fernandos nuk mjafton
Në pjesën e dytë, vendasit tentuan të reagonin, por u treguan të pasaktë para portës së Totoshit. Rasti më i mirë për ta ishte ai i Lushkjes në minutën e 67', por mesfushori nuk gjeti kuadratin nga një pozicion shumë i favorshëm. Ndeshja u ndërpre për disa minuta pas një incidenti të pazakontë në tribuna, ku një tifoz i Egnatias u rrëzua, çka solli shqetësim të madh për disa çaste. Përpjekjet e vendasve u shpërblyen vetëm në minutën e 81', kur Leo Melo fitoi një penallti pas një kontakti në zonë me Lulajn. Fernando mori përgjegjësinë dhe me shumë klas ekzekutoi në stilin “Panenka”, duke ngushtuar diferencën në 2-1.
[video width="648" height="360" mp4="https://cdnimpuls.com/lapsi.al/wp-content/uploads/2025/04/67f403aae99d1.mp4"][/video]
Megjithatë, në minutat e mbetura Elbasani menaxhoi mjaft mirë avantazhin dhe arriti të mbyllë takimin me një fitore tepër të rëndësishme, që e mban plotësisht në garë për të siguruar një vend mes katër skuadrave më të mira të kampionatit.
