Real Madrid është në emergjencë të plotë pas dëmtimeve të Thibaut Courtois dhe Andriy Lunin, të cilët kanë lënë skuadrën pa portierë. Kundër Valencias në javën e ardhshme të kampionatit do të luajë Fran Gonzalez, i cili mund të aktivizohet madje edhe në çerekfinalen e Champions League kundër Arsenal: 19-vjeçari mund të përjetojë një natë emocionuese në “Emirates” nëse asnjë nga kolegët e tij nuk arrin të rikuperohet në kohë për takimin.
Është alarm maksimal, sidomos sepse lojtari i lindur në vitin 2005 nuk ka asnjë përvojë me të rriturit dhe përballja me Champions League mund t’ia bëjë gjunjët të dridhen. Por ai është e vetmja alternativë që Carlo Ancelotti ka në dispozicion për momentin, pasi portieri titullar dhe zëvendësi i tij (i cili ka luajtur rregullisht gjatë gjithë sezonit të kaluar) janë jashtë fushave për shkak dëmtimesh dhe është e vështirë që të rikuperohen në kohë.
Real Madrid përballet me Arsenal, me një portier 19-vjeçar
Fran Gonzalez është e vetmja alternativë që Real Madrid ka në dispozicion për ndeshjet e ardhshme të kampionatit. Courtois është jashtë për shkak të një problemi në gjurin e djathtë, dhe në gjysmëfinalen e kthimit të Kupës së Mbretit, edhe Lunin pësoi një dëmtim – një mikroçarje në muskujt e shputës së djathtë. Asnjëri nga dy portierët nuk mund të luajë, prandaj në kampionat Ancelotti do t’i japë hapësirë lojtarit të lindur në 2005-ën, i cili mund të bëjë debutimin edhe në Champions League.
Lexo më tej: Ankohet për arbitrat, Real përmbys Leganes me dy "ndihma": penallti e faull të paqenë
Vështirë që ndonjëri nga dy portierët e dëmtuar të rikuperohet në kohë për sfidën ndaj Arsenal në Londër më 8 prill, dhe për këtë arsye Gonzalez po përgatitet të përjetojë një natë magjike, të mbushur me përgjegjësi. Numri një i ri grumbullohet rregullisht nga Kombëtarja U21 e Spanjës, por nuk do ta kishte imagjinuar kurrë se do të kishte rastin e tij në një skenë kaq të rëndësishme: Gonzalez mund të aktivizohet si titullar surprizë, dhe Real shpreson që ai të kalojë me sukses provimin e pjekurisë.
