Futbolli mund të zhytet sërish në një skandal të ri bastesh. Vitet e fundit nuk kanë munguar rastet e shumta në Europë dhe në botë – nga futbollistët e përfshirë në lojëra të ndaluara e deri te ndeshjet e trukuara. Sot, nga Bullgaria vjen një tjetër episod që lidhet me këtë plagë të sportit. Një video që është bërë virale menjëherë në rrjetet sociale tregon çfarë ka ndodhur në sallën VAR, gjatë ndeshjes mes CSKA dhe Lokomotiv Sofia, e përfunduar 1-0 për vendasit dhe e vlefshme për javën e 27-të të First League, elita e futbollit bullgar.
Rezultati kalon në plan të dytë: gjithçka ndodhi para fillimit të ndeshjes
Rezultati në fund të ndeshjes ra në harresë për shkak të asaj që ndodhi para se të niste loja. Ashtu si ndodh shpesh në Itali dhe në shumë vende të tjera, transmetimi televiziv, pak çaste para goditjes së parë të topit, u fokusua për disa sekonda në dhomën VAR. Aty ndodhi diçka që tronditi tifozët: tekniku VAR që ndihmon gjyqtarët në përzgjedhjen e pamjeve u kap teksa po shikonte një faqe bastesh në telefonin e tij.
Lexo më tej: Merrte qëllimisht kartonë të verdhë: Kike Salas arrestohet për bastet e futbollit
Pamjet tregojnë teknikun duke kontrolluar aplikacionin e basteve
Në pjesën e sipërme të pamjes duken dy gjyqtarët VAR dhe AVAR, Volen Chinkov dhe Stoyan Arsov, të fokusuar në monitorët përpara tyre. Në të majtë të tyre, një person i tretë – tekniku që menaxhon aspektin teknik të pamjeve – shfaqet me një smartphone në dorë, duke naviguar në një faqe të njohur bastesh. Kjo skenë nuk u shpëtoi tifozëve që shpërthyen në rrjetet sociale me komente zemërimi për atë që panë. Madje edhe vetë tekniku, kur e kuptoi se ishte në transmetim të drejtpërdrejtë, mbeti i habitur.
Çfarë shihet në pamjet që qarkullojnë në rrjete sociale
Ai nuk kishte vënë re që kamerat po e filmonin pikërisht në momentin kur ishte duke përdorur aplikacionin e basteve në telefonin e tij. Disa përdorues u përpoqën të zmadhonin pamjen për të kuptuar se cilën ndeshje po analizonte tekniku VAR përpara sfidës CSKA–Lokomotiv Sofia, por pa sukses. Kjo video ka shkaktuar zemërim të madh në rrjet, me tifozë që kërkojnë menjëherë shkarkimin e tij nga detyra dhe të tjerë që denoncojnë ashpër mungesën e etikës në një pozicion kaq të ndjeshëm.
