Në Gjermani, tarifat amerikane po përshkruhet si një shpallje e mirëfilltë lufte. Kancelari Olaf Scholz foli për sulm ndaj një rendi tregtar që ka krijuar prosperitet në të gjithë globin.
“Qeveria amerikane po merr një rrugë në fund të së cilës do të ketë vetëm humbës”, deklaroi ai.
Kreu i Këshillit të BE-së, António Costa shkoi edhe më tej. Pa përmendur bojkotimin e SHBA-së, por duke e nënkuptuar atë, Costa bëri thirrje që të zgjerohen marrëdhëniet tregtare me vendet e tjera.
Tani është koha për të ratifikuar marrëveshjet e reja të planifikuara të tregtisë së lirë me shtetet e Amerikës së Jugut dhe Meksikën. Tregtia është një motor i fuqishëm i prosperitetit global. BE-ja do të mbetet një mbështetëse e vendosur e tregtisë së lirë dhe të ndershme.
Kryetari i Komisionit të Tregtisë në Parlamentin e BE-së, Bernd Lange nga SPD-ja gjermane, foli për një “arbitraritet” “plotësisht të papranueshëm”, duke nënvizuar se dëmet nga e gjithë kjo situatë mund të mbërrijnë në miliarda. As Georgia Meloni, e vetmja lidere europiane që u ftuar në ceremoninë e betimit të Trumpit në muajin janar, nuk e sheh me sy të mirë këtë lëvizje të kreut të shtetit amerikan.
Kryeministrja italiane u shpreh megjithatë se shpreson në bashkëpunimin mes SHBA-së dhe Evropës për të shmangur një luftë tregtare, sipas saj, sepse kjo do ta dobësonte Perëndimin.
Presidenti i Dhomës së Tregtisë së Jashtme për Gjermaninë, Dirk Jandura pret mjaft pasoja negative për ekonominë vendase.
“Do ta them hapur: ne do ta ndjejmë këtë,” tha ai për agjencinë e lajmeve Reuters.
“Do të na duhet t’i përkthejmë tarifat në rritje çmimesh, dhe në shumë raste kjo do të thotë rënie në shitje, por për kompanitë më të vogla që tashmë janë shfaqur të dobësuara nga vitet e fundit të vështira, mund të nënkuptojë gjithashtu falimentin.”
