Përfaqësuesja republikane e Dhomës së Përfaqësuesve të Shteteve të Bashkuara, Marjorie Taylor Greene, u përlesh me një gazetare britanike gjatë një konference për shtyp duke i thënë asaj të "kthehej" në Mbretërinë e Bashkuar.
Konfrontimi ndodhi kur gazetarja e Sky News, Martha Kelner u përpoq të pyeste Greene, një aleate e zëshme e Presidentit Donald Trump, për të ashtuquajturin skandal “Signalgate”, në të cilin zyrtarë të lartë nga administrata Trump përdorën aplikacionin e koduar të mesazheve për të diskutuar planet e sulmit në Jemen.
Por përpara se Kelner të përfundonte pyetjen e saj në lidhje me incidentin, Greene e ndërpreu e inatosur duke e pyetur: "Prisni! Nga cili vend jeni?" Kur Kelner u përgjigj se ishte nga Britania e Madhe, përfaqësuesja e Georgia ngriti më keq tonet.
“Neve nuk na plas fare në lidhje me opinionin dhe raportimin tuaj" - tha Greene. “Pse nuk ktheheni në vendin tuaj ku keni një problem të madh me emigrantët?”
Teksa Kelner u përpoq t'i bënte presion Greene nëse ajo ishte e shqetësuar se "jetët amerikane po viheshin në rrezik" nga biseda e pasiguruar në Signal, kongresmenja u përgjigj: "A ju interesojnë njerëzit e vendit juaj? Po për të gjitha gratë që përdhunohen nga emigrantët?"
Duke refuzuar të merrte më pyetje nga Kelner, Greene iu drejtua një gazetari tjetër, i cili e identifikoi veten si amerikan dhe i kërkoi Greene t'i përgjigjej pyetjes së Kelner. Greene refuzoi përsëri.
Një mbështetëse e patundur e Trump dhe figurë e shquar në lëvizjen e presidentit Make America Great Again (MAGA), Greene është e njohur për shpërthimet e saj të forta dhe është përplasur me shtypin britanik edhe më parë.
Vitin e kaluar ajo i tha ish-gazetares së BBC, Emily Maitlis që të "q*hej" pasi Maitlis e pyeti për përhapjen e një teorie konspirative antisemitike se një zjarr në Kaliforni ishte nisur nga një rreze lazer nga hapësira. ©LAPSI.al
