Teuta ka rikthyer fitoren në kampionat në momentin më vendimtar, duke triumfuar minimalisht 1-0 ndaj Skënderbeut në “Niko Dovana”. Një sfidë e rëndësishme për mbijetesën, ku ekipi durrsak arriti të sigurojë tre pikë thelbësore, duke u larguar nga zona e fundit e renditjes.
Takimi u vendos nga një gol i shënuar nga Toma në minutat e para të ndeshjes, një moment që shkaktoi polemika. Fillimisht, arbitri e anuloi për një faull të mundshëm, por pas rishikimit në VAR, goli u konfirmua si i rregullt, duke ndezur protesta nga ana e ekipit korçar. Ernest Gjoka, tekniku i bardhekuqve ka treguar çfarë ndodhi me të tijtë: “Ishte një ndeshje e vështirë, mos ardhja e golit ishte çështje nervozizmi, as skuadra nuk pati atë qartësinë e vet përpara portës. Kur nervozohesh edhe lodhesh, kur nuk e ke kokën të qetë kjo ndodh. Në pjesën e parë u munduam të bëjmë atë që kishim përgatitur, ndonjëherë doli ndonjëherë jo. Duke pas parasysh se Teuta po u mbronte me 10 lojtarë, u munduam të bëjmë zgjedhjet tona alternative, por as ato nuk dolën”.
[video width="646" height="360" mp4="https://cdnimpuls.com/lapsi.al/wp-content/uploads/2025/03/67e579d94981f.mp4"][/video]
Pas këtij episodi, loja u karakterizua nga kujdesi i dy skuadrave, të cilat nuk arritën të krijonin shumë raste të rrezikshme për shënim. Në fund, Teuta mbrojti avantazhin dhe siguroi një fitore që i jep një shtysë të madhe në luftën për mbijetesë, ndërsa Skënderbeu mbetet në fund të tabelës. “Kishim një ngërç psikologjik dhe shumë të tensionuar sot - tha tekniku i bregdetarëve Bledar Hodo -. E rëndësishme ishte të fitonim dhe shpresoj që të kemi vazhdimësi në këtë lloj situate. Pjesën e parë kishim përgatitur një presion ultra ofensiv, por Skënderbeu nuk e luajti për asnjë moment topin pas".
Lexo më tej: Penalltia e parë pas 31 javësh, Domgjoni e humb: Partizani disfatë dramatike në derbi
Me këtë sukses, durrsakët ngjiten në vendin e shtatë me 33 pikë, në të njëjtin nivel me Laçin e Bylis, ndërsa Tirana i ndjek nga pas me 32 pikë në vendin e nëntë. Skënderbeu, ndërkohë, mbetet në pozicionin e fundit me 30 pikë dhe me shpresa të pakta për t’i shpëtuar rënies nga kategoria.
