Suedia ka shpallur planet për të rritur shpenzimet e saj të mbrojtjes me 30 miliardë dollarë gjatë dekadës së ardhshme, duke synuar një buxhet ushtarak që arrin 3.5% të Produktit të Brendshëm Bruto (PBV). Kryeministri Ulf Kristersson deklaroi në një konferencë shtypi se ky synim është në përputhje me atë që ai pret të bëhet një objektiv i ri për të gjitha vendet e NATO-s, i cili pritet të vendoset në samitin e aleancës në korrik.
Aktualisht, Suedia shpenzon 2.4% të PBV-së për mbrojtjen, tashmë mbi pragun minimal të NATO-s prej 2%. Planet për rritjen e këtij buxheti në 2.6% deri në vitin 2028 janë tashmë në proces, ndërsa qeveria synon të arrijë objektivin e ri ambicioz prej 3.5% brenda pesë viteve të ardhshme.
Për të financuar këtë rritje të madhe, qeveria suedeze ka parashikuar një hua prej 300 miliardë koronash suedeze (rreth 28 miliardë euro), një vendim që duhet të miratohet nga parlamenti. Legjislacioni për këtë çështje do të prezantohet më 15 prill dhe pritet të votohet deri më 20 qershor.
Kristersson ka theksuar se kjo lëvizje ka gjithashtu një rëndësi strategjike për marrëdhëniet transatlantike, duke pranuar se është një përpjekje për të ruajtur lidhjet e forta me Shtetet e Bashkuara. Ai u shpreh se disa deklarata dhe vendime të administratës Trump janë "të vështira për t’u kuptuar në Evropë" dhe se Europa duhet të forcojë mbrojtjen e saj.
Megjithëse detajet për ndarjen e fondeve nuk janë përcaktuar ende, shpenzimet pritet të përfshijnë investime në drone, sisteme të mbrojtjes ajrore dhe municione, duke fuqizuar kapacitetet ushtarake të Suedisë dhe duke e bërë atë një kontribuues më të fortë brenda NATO-s.
