24-vjeçarja palestineze, Rayyan Alwan, e cila u vra nga babai i saj në një shtëpi me qira në Tiranë, mund të varroset në Shqipëri. Asnjë nga të afërmit e saj nuk ka kërkuar të marrë trupin e pajetë për ta çuar në banesën e fundit.
Burime nga policia thonë se janë informuar të afërmit e vajzës përmes oficerëve të kontaktit, por askush nuk ka shprehur interes për të tërhequr trupin. Aktualisht, viktima mbahet në morgun e Tiranës dhe nëse brenda afateve ligjore nuk merret nga familjarët, ajo do të varroset në Tiranë.
Rayyan dhe babai i saj, Fadi Alwan, mbërritën në Rinas më 19 shkurt dhe u vendosën në një banesë me qira në rrugën Gjon Muzaka. Sipas hetuesve, më 22 shkurt, Fadi Alwan vrau vajzën me disa goditje thike, pastaj u largua nga Shqipëria drejt Greqisë e më pas në Amsterdam. Ai dyshohet të ketë udhëtuar për në Liban dhe deri tani nuk është arrestuar.
Trupi i pajetë i Rayyan u gjet nga pronarja e banesës pesë ditë pas largimit të autorit. Fillimisht u raportua se bashkëshorti kishte vrarë gruan, por hetimet zbuluan se Rayyan Alwan u vra nga babai i saj. Fadi Alwan është aktualisht një nga personat më të kërkuar për vrasje dhe policia vazhdon kërkimet.
