Policia italiane ka arrestuar një 50-vjeçar shqiptar, teksa ishte bërë pjesë e një rrjeti të trafikut të kokainës në zonën e Fermos. Gjatë kontrollit fizik është sekuestruar një sasi e vogël droge dhe 1 mijë euro cash, peshore dhe sende të tjera materiale.
Aksioni u krye në zonën e Porto Sant'Elpidio, kur efektivët pikasën një çift që bënte sjellje të çuditshme dhe të dyshimta, duke i mbajtur nën vëzhgim. Të dyshuarit hidhnin vështrime të shpeshta në drejtime të ndryshme, në dukje për të kontrolluar për ndonjë patrullë policie.
Një makinë me targa shqiptare është afruar pranë gruas, teksa kjo e fundit ka shkëmbyer diçka me shoferin.
Policia ndaloi çiftin, ku gruaja e dyshuar është një 40-vjeçare, që pranoi se sapo kishte blerë 5 gramë kokainë, duke treguar një paketë me substancën dhe duke deklaruar se kishte paguar 250 euro për dozën. Ndërkohë, një patrullë ndaloi makinën me shoferin, i cili pranoi menjëherë se kishte shitur drogën.
Gjatë kontrollit, efektivët gjetën tre pako me kokainë të fshehura brenda një këpuce dhe nën sediljen e shoferit, si dhe kartëmonedha, në total 1000 euro.
Oficerët, duke mos përjashtuar se mund të kishte edhe drogë të tjera të fshehura, vendosën të kontrollonin edhe dhomën e tij në hotel. Këtu u gjetën pesë pako të tjera që përmbanin kokainë, si dhe një peshore precize e mjete për paketimin e dozave, informon media. Gruaja u denoncua në Prefekturën e Fermos si përdoruese droge, ndërsa shqiptari u izolua në qelitë e Komisariatit të Fermos, ku gjyqtari dha edhe masën e arrestit me burg.
