Shqipëria është gati për sfidën kundër Anglisë, me trajnerin Sylvinho që ka përcaktuar formacionin titullar. Një nga lajmet kryesore është mungesa e Ardian Ismajlit, i cili nuk ka arritur të rikuperohet në kohë, duke i hapur rrugën Ajetit për të luajtur nga minuta e parë në qendër të mbrojtjes. Në repartin ofensiv, trajneri brazilian i ka besuar Rei Manajt si titullar, ndërsa Armando Broja, ende në proces rikuperimi nga dëmtimi, pritet të aktivizohet gjatë ndeshjes.
Me vetëm pak orë deri në nisjen e takimit në “Wembley”, kuqezinjtë synojnë një paraqitje dinjitoze në debutimin e tyre në eliminatoret e Botërorit 2026. Sylvinho ka vendosur të qëndrojë besnik ndaj skemës së tij tradicionale me katër mbrojtës, pavarësisht mungesave të rëndësishme.
Në krahun e majtë të mbrojtjes, Balliu pritet të marrë përsipër këtë detyrë, edhe pse ka pasur pak minuta lojë në muajt e fundit. Hadroj, një alternativë tjetër, gjithashtu nuk ka qenë aktiv, pasi sezoni në Ukrainë për ekipin e tij të ri ende nuk ka nisur. Kështu, Aliji mbetet opsioni i vetëm tjetër natyral për këtë pozicion, por braziliani ka zgjedhur të mbështetet te Balliu për shkak të eksperiencës së tij ndërkombëtare.
Formacioni i mundshëm i Shqipërisë
Portieri: StrakoshaMbrojtës: Balliu, Ajeti, Gjimshiti, Aliji
Mesfushorë: Ramadani, Asllani; Asani, Laçi, Bajrami
Sulmues: Manaj
Në mesfushë nuk priten ndryshime – Ramadani dhe Asllani do të formojnë dyshen para mbrojtjes, me Ramadanin që ka më shumë shanse të luajë titullar në vend të Berishës në duelin e mesfushorëve të Lecce-s. Sa i përket sulmit, Asani mbërrin me një formë të shkëlqyer pas paraqitjeve të tij në Korenë e Jugut, Bajrami kërkon të lërë pas vështirësitë te Rangers dhe të tregojë vlerat e tij, ndërsa Laçi mbetet një element i rëndësishëm për ekuilibrin e skuadrës.
Lexo më tej: Sylvinho si Kolombi, në zbulim të Amerikës: braziliani ka një mision e një plan
Në sulm, Rei Manaj do të jetë pika e referencës, pasi Broja, i cili sapo është kthyer nga një dëmtim i gjatë, nuk është ende gati për të përballuar 90 minuta. Për momentin, formacioni duket i qartë, por Sylvinho mund të rezervojë ndonjë surprizë për të sfiduar Tuchel dhe stafin e tij teknik.
