Erion Veliaj ka shkarkuar Anuela Ristanin nga funksioni i kryetares në detyrë të bashkisë Tiranë. Veliaj ia ka deleguar këtë detyrë nënkryetares Sara Goxhaj, një nga bashkëpunëtoret e tij më të afërta. Urdhëri mendohet se është firmosur prej tij nga qelia e burgut në Durrës. Ky vendim shfuqizon atë të Ramës që komunikoi se kryetarja e re e bashkisë ishte Anuela Ristani.
“URDHËROJ: Znj, Sara Goxhaj, Nën/kryetar i Bashkisë Tiranë, të kryejë përkohësisht edhe detyrat e kryetarit të bashkisë Tiranë. Periudha e ushtrimit të kompetencave të deleguara, fillon më datë 19.03.2025, deri në një urdhër të dytë. Urdhri nr. 366, datë 14.02.2025 “Për delegimin e përkohshëm të detyrave të kryetarit të Bashkisë Tiranë”, shfuqizohet. Ngarkohet Sekretari i Përgjithshëm, Kabineti i Kryetarit, Drejtoria e Përgjithshme e Administrimit të Brendshëm, Drejtoria e Përgjithshme e Medias dhe Komunikimit për qytetarët për zbatimin e këtij urdhri”, shkruhet në dokument.
Postin e kryebashkiakut në detyrë të Tiranës e mbante nënkryetarja Anuela Ristani, e cila u vendos pas arrestimit të Erion Veliaj më 10 shkurt.
