Qindra studentë dhe mijëra qytetarë nga çdo cep i metropolit turk u mblodhën sot jashtë Bashkisë së Stambollit për të shprehur mbështetjen e tyre ndaj Ekrem İmamoğlu, kryebashkiakut të arrestuar. Tensionet u rritën kur policia ndërhyri me gaz lotsjellës për të shpërndarë turmën, duke shkaktuar incidente të shumta.
Në qendër të protestës qëndron arrestimi i İmamoğlu, një figurë e njohur opozitare, i cili përballet me akuza që shumë i konsiderojnë të motivuara politikisht.
Protestat, të udhëhequra kryesisht nga studentët e universiteteve të njohura si Galatasaray, Mimar Sinan dhe Universiteti Teknik i Stambollit, nisën fillimisht në Beyazıt dhe më pas u shtrinë në Beşiktaş dhe Saraçhane, ku ndodhet godina e Bashkisë Metropolitane.
Përleshja me policinë dhe bllokimi i rrugëve
Kur një grup protestuesish tentoi të marshonte drejt sheshit Taksim, forcat e sigurisë ngritën barrikada në zonën e Bozdoğan Kemeri. Situata eskaloi kur studentët sfiduan policinë, duke u përpjekur të kalojnë barrikadat.
Përplasjet u intensifikuan, me studentët që thërrisnin slogane si: "Kemi ardhur për të protestuar, jo për të tubuar!" dhe "Kjo rrugë përfundon në Taksim!"
Një pjesë e protestuesve shprehen se kanë frikë të japin identitetin e tyre, ndërsa një student anonim i tha korrespondentit të BBC-së turke: "I thashë familjes sime se kam ardhur për të prishur agjërimin, por në të vërtetë jam këtu për protestën."
Rezistenca vazhdon
Teksa tensionet në terren vazhdojnë, mes turmës shihen protestues që prishin agjërimin e Ramazanit me ushqime dhe lëngje frutash, ndërsa ezani kumbon në sfond. Situata në Stamboll mbetet e paqëndrueshme, ndërsa protestuesit deklarojnë se nuk do të ndalen derisa të arrihet drejtësia për Ekrem İmamoğlu.
https://www.youtube.com/shorts/IeMNJIPxxL4?feature=share
