Gattuso i pandreqshëm, përplaset me ish-futbollistin në TV live: “Ma thuaj në fytyrë“

Gennaro Gattuso shpërtheu në një përplasje të tensionuar live në televizion. Trajneri italian, pas humbjes së ekipit të tij Hajduk Split në sfidën direkte ndaj Rijekës, nuk i kurseu fjalët ndaj ish-futbollistit Josko Jelicic, sot opinionist televiziv. Me nervat në maksimum, ish-kampioni i botës iu kundërpërgjigj në mënyrën e tij të veçantë kritikave të ashpra që kishte marrë, duke përdorur edhe tone shumë të forta.

Gattuso i pakontrollueshëm në TV live, debat i ashpër me Jelicic

Që në momentin kur hyri në studion e MAXSport, u kuptua se Gattuso kishte diçka për të sqaruar. Teksa përshëndeti të gjithë me një shtrëngim duarsh, injoroi plotësisht Jelicic. Kur u pyet për këtë gjest, ai u përgjigj prerë: “Me ty nuk kam çfarë flas, sepse flet shumë dhe nuk ke respekt për njerëzit. Ke luajtur futboll dhe duhet ta kuptosh situatën, por ti vetëm kritikon. Nuk kam asnjë respekt për ty.”

Shpërthimi i italianit Gattuso pas provokimit të Jelicic

Në atë moment, Jelicic hodhi më shumë benzinë në zjarr, duke e provokuar: “Skuadra jote luan shumë keq”. Kaq u desh që Gattuso të shpërthente, duke e ngritur gishtin tregues disa centimetra larg fytyrës së analistit dhe duke i thënë me një ton kërcënues: “Duhet të respektosh njerëzit!” Jelicic e qortoi menjëherë: “Mos e përdor dorën kështu!” Por Gattuso nuk ndaloi: “Ky është stili im! Mos fol vetëm kur je në studio, fol këtu për futboll. Ballë për ballë. Nuk dua të flas më me ty.”

Things got heated between Joško Jeličić and Gennaro Gattuso after the match. pic.twitter.com/NZEd6Qe04x

— Croatian Football (@CroatiaFooty) March 16, 2025

“Kjo është hera e fundit që vij këtu”

Debati u mbyll me një premtim të fortë nga trajneri italian: “Kjo është hera e fundit që jam këtu. Nuk do të flas më me këtë televizion nëse ai është aty, sepse ai është një njeri i keq.” Më pas, Gattuso e vuri në dyshim karrierën e Jelicic, duke thumbuar: “Çfarë ke fituar ti në jetën tënde? Flet sikur ke fituar gjithçka, por nuk ke respekt!” Pas largimit të trajnerit, Jelicic komentoi situatën me një qëndrim të ftohtë: “Më akuzoi se flas vetëm keq për Hajdukun. Kur i thashë të mos më tregonte me gisht, ai u përgjigj se ky ishte stili i tij. Atëherë i thashë: ‘Je i huaj, respekto vendin tonë. Unë kam të drejtë të them çfarë të dua.’”