Befasi në Wembley: Newcastle mposhti 2-1 Liverpool, kryesuesin e Premier League, dhe fitoi për herë të parë në histori Kupën e Ligës. “Magpies” triumfuan në finalen e madhe falë një goditjeje me kokë të Burn (45’) dhe një finalizimi të Isak (52’), duke rikthyer një trofe anglez në klub pas vitit 1955, kur kishin fituar FA Cup. Chiesa shënoi në minutën e 94’, por nuk mjaftoi: pas eliminimit nga Champions League, skuadra e Slot humbi një tjetër trofe.
Newcastle thyen mallkimin dhe më në fund fiton Kupën e Ligës, duke lënë pas humbjet në finalet kundër Manchester United dhe Manchester City. Ky është trofeu i parë për klubin pas 19 vitesh (Intertoto Cup 2006) dhe suksesi i parë në kompeticionet angleze pas 70 vitesh, që nga FA Cup e sezonit 1954/1955. Skuadra e Eddie Howe shkroi historinë, ndërsa Liverpooli humbi një tjetër objektiv vetëm disa ditë pas eliminimit nga Champions League përballë PSG-së në Anfield.
Çfarë ndodhi në fushë?
Finalja nisi e ekuilibruar, me të dyja skuadrat të kujdesshme. Pikërisht para përfundimit të pjesës së parë, Newcastle gjeti golin e epërsisë. Në minutën e 45-të, Burn u ngrit më lart se të gjithë pas një harkimi nga këndi i Trippier dhe goditi me kokë në cepin e portës, duke çuar në delir tifozët e Newcastle në Wembley.
Pjesa e dytë nisi keq për Liverpool. Në minutën e 51’, Isak shënoi, por goli u anulua për pozicion jashtë loje. Megjithatë, vetëm një minutë më vonë, suedezi nuk fali. Pas një asisti me kokë nga Murphy, Isak goditi saktë me të djathtën dhe e dërgoi topin në rrjetë për rezultatin 2-0.
Lexo më tej: Merino "zhyt" Chelsea, por Arsenal është -12 nga Liverpool: fiton derbin edhe Fulham
Trajneri i Liverpool, Arne Slot, reagoi menjëherë duke kryer pesë zëvendësime brenda 18 minutave, duke futur në lojë Núñez, Jones, Gakpo, Elliott dhe Chiesa. Ish-sulmuesi i Juventus shënoi në minutën e 94’ pas një asisti nga Elliott, duke rihapur për pak finalen. Në fund pati edhe një episod të diskutueshëm me një ndërhyrje të ashpër të Joelinton, që mund të ndëshkohej me karton të kuq, por arbitri nuk e nxori.
Pas disa tentativave të dëshpëruara nga Liverpool, vërshëllima e trefishtë e arbitrit vulosi historinë: Newcastle shpërtheu në lot, por këtë herë nga gëzimi. Pas 70 vitesh pritjeje, “Magpies” fituan më në fund një trofe të madh. Liverpool mbetet me “vetëm” Premier League si objektivin e fundit të sezonit, në një javë të errët për skuadrën e Slot.
