Real Madrid përjetoi një tjetër natë të paharrueshme në Champions League, duke kaluar në çerekfinale pas fitores me penallti kundër Atletico Madrid. Suksesi i “Blancos” erdhi mes polemikave, veçanërisht për penalltinë e Julian Álvarez që u anulua nga VAR, një vendim që e zemëroi teknikun Diego Simeone në konferencën për shtyp. Kjo ndezi edhe më shumë atmosferën mes tifozëve të Atleticos, të cilët u ndjenë të provokuar nga disa lojtarë të Realit, siç ishte rasti i Vinicius, por e kapën me anglezin Jude Bellingham.
Pas kalimit të turit, festimet e lojtarëve të teknikut Ancelotti rrezikuan të ktheheshin në një skenë kaotike për shkak të zemërimit të tifozëve vendas pas vërshëllimës përfundimtare.
Bellingham goditet nga tribuna, por reagon ndryshe nga ç’pritej
Lojtarët e Real Madrid shkuan të festonin pranë sektorit ku ndodheshin tifozët e tyre, duke e tepruar me festën dhe duke marrë një reagim të ashpër nga publiku i Atletico Madridit. Një nga lojtarët më të shënjestruar ishte Jude Bellingham, i cili në një moment u godit nga një shishe plastike e hedhur nga tribuna. Për fat të mirë, mesfushori anglez nuk u lëndua, madje reagoi në një mënyrë krejt të papritur.
Bellingham largon shishen me kokë
Teksa lojtarët e Real Madrid po festonin, disa tifozë të Atletico, të zhgënjyer nga eliminimi, filluan të linin stadiumin, por jo të gjithë e pranuan disfatën në heshtje. Një prej tyre hodhi një shishe plastike drejt Bellingham, por në vend që të shmangej ose të reagonte me nervozizëm, anglezi e largoi me një goditje të kokës, sikur të ishte një top futbolli.
Pavarësisht situatës së tensionuar, Bellingham, i karikuar nga adrenalina e momentit, tregoi qetësi dhe e trajtoi incidentin me një gjest befasues. Një veprim i tillë vetëm sa e shtoi zhgënjimin e tifozëve vendas, të cilët do ta kujtojnë gjatë këtë mbrëmje të hidhur.
