Foto e Erjon Veliajt që del nga gjykata e posaçme duke hipur në furgonin e policisë mund të konsiderohet edhe shfaqja finale e një spektakli të shpërndarë me kaseta të gatshme, që kemi thuajse 10 vjet që e shohim: kryebashkiaku i “pemëve”, “kopshteve” i “pyllit orbital” dhe “pyllit vertikal” duke bërë xhiro me furgonin e policisë.
Mbetet për t'u parë nëse do të jetë biletë vetëm vajtje drejt Durrësit. Vendimin do ta marrë nesër Apeli i Gjykatës së Posaçme, aty ku prokurorët Altin Dumani dhe Ols Dado depozituan sot edhe disa prova të reja.
Nëse provohet se Veliaj vazhdoi të dirigjojë nga qelia presionet ndaj prokurorëve, gjasat janë që mjeshtri i fasadave të shembet një herë e mirë nga drejtësia. Megjithatë fjalën e fundit do ta thotë të mërkurën gjykatësi Engert Pëllumbi.
Për kryebashkiakun e Tiranës që e nisi karrierën me një biçikletë dhe tani e hipin në një linjë speciale të transportit, nuk është çudi që destinacioni tjetër të jetë drejt Fierit, aty ku ish-zyrtarë të tjerë socialistë po vuajnë dënimin për korrupsion.
Rëndësi ka që drejtësia të bëjë punën e saj dhe të mos ndalet; ashtu si premtimet e dikurshme të Veliajt për një “Tiranë që s’ndalet”; ashtu si furgoni i policisë që u nis drejt të Durrësit pa u ndalur. Me marshin e pestë drejt paraburgimit!
