Gjykata e Lartë ka rrëzuar rekursin e ish-deputetit të PD, Ervin Salianji, kundër dënimit me 1 vit burg nga Gjykata e Apelit të Juridiksionit të Përgjithshëm. Ky vendim i dogji shansin e fundit Salianjit për të kandiduar për deputet në zgjedhjet e 11 majit.
Nëse sot Gjykata e Lartë do të rrëzonte vendimin e Gjykatës së Apelit, atëherë Ervin Salianji do të kishte të drejtën të kandidonte për deputetë, nëse PD do ta vendoste në listat e kandidatëve. Me rrëzimin e kërkesës së tij sot, Salianji do të vijojë të qëndrojë në burg deri në shlyerjen e dënimit.
“Mospranimin e rekurseve të paraqitura nga të gjykuarit Jetmir Olldashi dhe Ervin Salianji, kundër vendimit nr.2059/30-2024-6822, datë 26.09.2024, të Gjykatës së Apelit të Juridiksionit të Përgjithshëm”, njoftoi Gjykata e Lartë.
Edhe më datë 15 tetor 2024, Gjykata e Lartë e refuzoi kërkesën e Salianjit për pezullimin e dënimit me 1 vit burg nga Apeli.
Ish-deputeti i PD-së po vuan dënimin me burg për kallëzim të rremë.
Kujtojmë që Ervin Salianji u dënua nga Gjykata e Apelit për kallëzim të rremë, pasi në 2018-ën publikoi materiale të prezantuara si audio-përgjime, përmes së cilave pretendonte se vëllai i ministrit të Brendshëm atë kohe, Fatmir Xhafaj, ishte i përfshirë në trafikun e drogës.
