Thiago Motta irritohet me gazetarin: “Bëre pyetjen, tani dëgjo. Nuk vij për skena”

Thiago Motta shpërthen dhe sulmon një gazetar në konferencën për shtyp pas humbjes së rëndë të Juventusit kundër Atalantës: “Të inatosem dhe të hedh shishe në dhomën e zhveshjes? Nuk është në karakterin tim të bëj skena, jam një person i ndershëm dhe një profesionist. Nga unë nuk do të shihni kurrë sjellje të tilla. Jam i trishtuar dhe i zhgënjyer, por që nesër duhet të kemi forcën për të menduar për ndeshjen e ardhshme dhe për të bashkuar edhe më shumë skuadrën, jo ashtu siç ke shkruar ti (duke iu referuar gazetarit që bëri pyetjen, shën. red.), duke folur për mikun e mikut…” Gazetari në fjalë është Massimiliano Nerozzi nga Corriere della Sera, i cili disa ditë më parë kishte publikuar rrëfimin e një futbollisti të Juventusit, i cili mbeti anonim, ku fliste për tensionet mes skuadrës dhe trajnerit.

? VIDEO - #ThiagoMotta post #JuveAtalanta 0-4 a Nerozzi: "Ko 4-0 in casa come meteorite e non mi incavolo? Tu ora mi ascolti, io non faccio sceneggiate, sono persona seria.. Serve unire ancora più lo spogliatoio, non come tu hai scritto sbagliando parlando dell'amico dell'amico" pic.twitter.com/W6DewF31t7

— JUpensiero (@JUpensiero) March 10, 2025

Thiago Motta, tensionet me lojtarët: rrëfimi anonim

Disa ditë pas eliminimit nga Kupa e Italisë përballë Empolit, Corriere della Sera publikoi një artikull ku zbuloheshin tensionet brenda dhomës së zhveshjes së Juventusit. Një futbollist i ekipit bardhezi ishte shprehur te një mik i tij për mënyrën e punës së Thiago Mottës: “Nuk e duroj dot dhe nuk jam i vetmi.” Në bazë të kësaj situate qëndronte marrëdhënia mes lojtarëve dhe trajnerit: “Nuk e di kurrë çfarë të presësh, nga titullar në 90 minuta në stol.” Në konferencën pas ndeshjes kundër Atalantës, Massimiliano Nerozzi, gazetari i njohur i Corriere della Sera, e pyeti Mottën nëse ishte “i nxehur” për humbjen apo nëse kishte pasur ndonjë reagim të fortë në dhomën e zhveshjes pas disfatës së rëndë.

Reagimi nervoz i teknikut

Trajneri i Juventusit nisi të përgjigjej, por ndërsa gazetari e ngacmoi më tej, ai reagoi i irrituar: “Jo, prit… bëre pyetjen dhe tani po të përgjigjem. Nëse pret që unë të hedh shishe apo të bëj skena në dhomën e zhveshjes, nuk është në karakterin tim dhe nuk jam i tillë. Jam një person serioz, e di rolin tim dhe jam i ndershëm. E pranoj superioritetin e kundërshtarit, por njëkohësisht duhet ta rinisim javën sepse kemi një ndeshje të rëndësishme kundër Fiorentinës. Nga unë nuk do të shihni kurrë diçka që nuk e ndiej vërtet, apo skena që të tjerët duhet t’i shohin". "Jam i trishtuar dhe i zhgënjyer, është e vështirë të tretet një humbje e tillë, por nga nesër duhet të kemi forcën për të menduar për ndeshjen tjetër dhe për të bashkuar akoma më shumë skuadrën, jo ashtu siç ke shkruar ti, gabimisht, duke folur për mikun e mikut… dhe të vazhdojmë të shikojmë përpara.” Thiago Motta, dukshëm, nuk e ka pritur mirë atë që është bërë publike javët e fundit. Pasi fillimisht u përpoq ta anashkalonte temën, ai ndjeu se po e ngacmonin dhe u shpreh me nervozizëm, duke reflektuar tensionin që ka përfshirë të gjithë ambientin e Juventusit.