“Kantieri” e ka cilësuar kryeministri Edi Rama takimin që zhvilloi për 3 ditë radhazi me me ministrat e kabinetit qeveritar dhe drejtuesit politikë të PS në 12 qarqet e vendit.
Dy të ditët e para takimet u zhvilluan në Pallatin e Brigadave ndërsa këtë të diel ai mblodhi disa drejtues të PS-së në Vilën 30 në zonën e ish-Bllokut në Tiranë.
Në fokus kanë qenë reformat e realizuara, premtimet që do të bëhen në fushatë, por edhe lista e kandidatëve që do të garojnë në zgjedhjet e 11 majit për Partinë Socialiste.
Të dielën, Rama u takua me Sekretarin e Pëgjithshëm të PS-së Blendi Klosi, që është njëherësh drejtues i qarkut të Dibrës, me Mirela Kumbaron për Gjirokastrën, Ulsi Manjën për Lezhën, Emirjana Sakon për Durrësin dhe Benet Becin për Shkodrën.
Po ashtu konsultime janë zhvilluar edhe me Bledi Çuçin për Vlorën e Niko Peleshin për Korçën. Lista finale pritet të miratohet në mbledhjen e Kryesisë socialiste që do të mbahet më 12 Mars dhe po në të njëjtën ditë do të dorëzohet në KQZ.
Kryeministri Rama pritet të kandidojë në listën e hapur, në Tiranë. Po ashtu në listën e hapur mund të jenë edhe shumë prej deputetëve aktualë. Ndërsa në listën e mbyllur, Rama do t’i japë më shumë prioritet grave, vajzave si dhe të rinjve. ©LAPSI.al
