José Mourinho nuk është kurrë banal, aq më pak kur bëhet fjalë për arbitrat dhe drejtuesit e federatës. Pasi u pezullua për akuzat e bëra pas sfidës kundër Galatasaray, trajneri i Fenerbahçe ka sulmuar sërish klubin tjetër të Stambollit, duke shpjeguar se dënimi i tij nuk ka të bëjë thjesht me ngjarjet në fushë, por me diçka shumë më të madhe.
“Pas derbit me Galatasaray, u pezullova për katër ndeshje. Të njëjtën ditë doli lajmi se presidenti i komitetit disiplinor po festonte me fanellën e Galatasaray. Pas 10 orësh, pezullimi im u reduktua nga katër në dy ndeshje. Kjo duhet t’ju bëjë të kuptoni përmasat e asaj që ka ndodhur,” shpjegoi Mourinho për Sky Sports UK, përpara se të ashpërsonte më tej tonin në një intervistë për TNT Sport.
Lexo më tej: Mourinho fut në sherr dy gjigantët turq: Fenerbahçe ngre padi kundër Galatasaray
“Këtu në Turqi nuk bëhet fjalë vetëm për një rivalitet futbollistik, por për një sistem të dominuar nga një klub i vetëm, i cili përcakton kampionatin. Nuk ka një erë të mirë” (tha ai duke qeshur, red.). “Fenerbahçe është një klub që po përpiqet dëshpërimisht të thyejë dominimin e Galatasaray, por nuk është një dominim sportiv, përkundrazi, është një sistem i ngritur mbi këtë dominim. Dhe kjo e bën punën tonë jashtëzakonisht të vështirë. Unë punoj për një klub të madh, një klub të pastër dhe transparent, i cili dëshiron të fitojë dhe të pastrojë kampionatin turk në mënyrën më të drejtë”.
Mourinho: “Jam bërë një trajner më i mirë”
Duke ruajtur stilin e tij karakteristik, Mourinho pranoi se vitet e fundit ka evoluar si trajner dhe ka ambicie të mëdha: “Kam ndryshuar për mirë. Mendoj se tani jam një trajner më i mirë se në të kaluarën, me më shumë eksperiencë dhe për të cilin gjithçka duket si një déjà vu. Mendoj më pak për veten dhe më shumë për të tjerët, për lojtarët e mi, për drejtuesit dhe për tifozët e klubit tim. Ndihem shumë më mirë tani sesa më parë. Sigurisht, kam ndryshuar fizikisht, por si trajner, jam më i mirë se në të shkuarën”.
