Tre shtetas bullgarë janë shpallur fajtorë për spiunazh në favor të Rusisë, në atë që policia britanike e ka përshkruar si "një nga operacionet më të mëdha" të inteligjencës së huaj në Mbretërinë e Bashkuar. Vanya Gaberova 30 vjeçe, Katrin Ivanova 33 vjeçe dhe Tihomir Ivanchev 39 vjeç, të cilët jetonin të gjithë në Londër, ishin pjesë e një grupi që kishte udhëtuar në Evropë duke kryer mbikëqyrje ndaj gazetarëve, një ish-politikani dhe një bazë ushtarake amerikane në Gjermani midis viteve 2020 dhe 2023.
Treshja kishte punë ditore si estetiste, punonjëse e kujdesit shëndetësor dhe dekorator, ata ishin pjesë e një komploti për të rrëmbyer dhe vrarë objektiva, si dhe për t'i kapur shënjestrat e tyre në të ashtuquajturat kurthe mjalti. Metodat që ata përdorën ishin ato që "do të prisnit të shihni në një roman me spiunë", tha Dominic Murphy i Policisë Metropolitane Britanike.
Gaberova, Ivanova dhe Ivanchev u dënuan për komplot për spiunazh, ndërsa Ivanova u dënua gjithashtu edhe për posedim të dokumenteve të shumta false të identitetit. Ata punonin për shokun e tyre bullgar Orlin Roussev, 47 vjeç, i cili drejtonte rrjetin e spiunazhit. Aty policia gjeti një "thesar" pajisjesh spiunazhi, duke përfshirë kamera të fshehura në kravata, një kamerë të fshehur në një gur të rremë dhe syze që përmbanin pajisje regjistrimi.
Ata gjetën gjithashtu një numër lodrash përkëdhelëse Minions, duke përfshirë një që përmbante një kamerë spiune. Roussev i konsideronte ata që punonin për të si "minionët" e tij.
Roussev kishte pranuar më parë konspiracion për të spiunuar, së bashku me Biser Dzhambazov, 43 vjeç ndërsa një i pandehur i gjashtë, Ivan Stoyanov, 34 vjeç pranoi gjithashtu para gjyqit se ishte përfshirë në spiunazh.
Objektiv kryesor i celulës ishin gazetarët investigativë Christo Grozev dhe Roman Dobrokhotov, puna e të cilëve ishte e fokusuar në ekspozimin e rolit të Rusisë në sulmet me agjent nervor ndaj liderit të opozitës ruse Alexei Navalny në 2020 dhe Sergei Skripal në Salisbury në 2018. Gaberova u udhëzua të miqësohej me Grozev. Roussev e përshkruante atë si "të lidhur dhe të dashuruar" në mesazhet WhatsApp.
Një tjetër operacion përfshinte mbikëqyrjen për të identifikuar ushtarët ukrainas në një lokacion ushtarak ku ata po stërviteshin gjatë kohës së pushtimit rus të vendit në vitin 2022.
Gjatë gjyqit, prokurorja Alison Morgan tha se celula e spiunazhit ishte "e sofistikuar në metodologjinë e tyre. Hetimi i policisë përfshiu 221 telefona celularë, 495 karta SIM, 11 dronë dhe pajisje që lejojnë nxjerrjen e të dhënave nga telefonat dhe përgjimin e aktivitetit Wi-Fi. Shefi i kundër-terrorizmit, Murphy, tha se rasti ishte një operacion "jashtëzakonisht i sofistikuar" që "paraqiste një kërcënim për sigurinë kombëtare dhe individët". ©LAPSI.al
