Ministria e Punëve të Jashtme të Kinës ka premtuar se Kina do të “luftojë deri në fund” me SHBA-në në një “luftë tarifash, luftë tregtare apo çdo luftë tjetër”, duke shënuar retorikën më të ashpër të Kinës ndaj presidentit amerikan Donald Trump që nga hyrja e tij në Shtëpinë e Bardhë.
Të martën, në përgjigje të vendosjes nga Trump të një tarife shtesë prej 10% mbi mallrat kineze, duke e çuar detyrimin në 20%, zëdhënësi i ministrisë së jashtme kineze, Lin Jian, tha: “Ushtrimi i presionit ekstrem mbi Kinën është objektivi i gabuar dhe llogaritje e gabuar … Nëse SHBA ka qëllime të tjera dhe këmbëngul në një luftë tarifash, luftë tregtare apo çdo luftë tjetër, Kina do të luftojë deri në fund. Ne i këshillojmë SHBA-së të lërë mënjanë fytyrën e saj bullizuese dhe të kthehet sa më shpejt në rrugën e duhur të dialogut dhe bashkëpunimit.”
Komentet për “çdo luftë tjetër” u ndanë në X nga zëdhënësi i ministrisë së punëve të jashtme. Postimi u rishpërnda më pas nga ambasada kineze në Shtetet e Bashkuara. Ambasada e përsëriti mesazhin, duke shkruar: “Nëse lufta është ajo që SHBA-ja dëshiron, qoftë një luftë tarifash, një luftë tregtare apo çdo lloj tjetër lufte, ne jemi gati të luftojmë deri në fund.”
Kina kundërshton fuqishëm përpjekjet e Trump për të lidhur tarifat me rrjedhën e drogës fentanol nga Kina në SHBA. Lin tha se çështja e fentanolit ishte “një justifikim” për SHBA-në për të vendosur masa të ashpra tregtare ndaj Kinës.
Kina u kundërpërgjigj këtë javë duke vendosur tarifa deri në 15% mbi një sërë produktesh bujqësore amerikane.
Të mërkurën, Këshilli i Shtetit i Kinës publikoi një dokument të titulluar: “Kontrollimi i Substancave të Lidhura me fentanolin – Kontributi i Kinës”. Dokumenti deklaronte se “Kina i përmbush rreptësisht detyrimet e saj ndërkombëtare për kontrollin e drogës” dhe se operacionet kundër narkotikëve janë “një fokus qendror i bashkëpunimit midis Kinës dhe SHBA-së”. Në vitin 2019, Kina klasifikoi të gjitha format e fentanolit, duke e bërë atë vendin e vetëm të madh që përfshiu përgjithmonë këto droga në listën e substancave të kontrolluara. Por Shtëpia e Bardhë thotë se “zyrtarët kinezë kanë dështuar të ndërmarrin veprimet e nevojshme për të ndaluar rrjedhën e kimikateve pararendëse” drejt grupeve të krimit të organizuar, si kartelet e drogës në Meksikë.
Komentet e ashpra të Lin-it vijnë ndërsa Kina po pret ngjarjen e saj më të madhe vjetore politike, “dy sesionet”. Ky emër i referohet mbledhjeve paralele të parlamentit kinez, Kongresit Kombëtar të Popullit, dhe një organi kryesor këshillues. Këto ngjarje janë të kuruara me kujdes dhe zakonisht nuk përfshijnë një retorikë agresive “luftëtari ujk” si komentet e Lin-it. Në ceremoninë hapëse të KKP-së, kryeministri Li Qiang mbajti raportin e punës së qeverisë, ku tha se bota po përjeton “ndryshime të paparë në një shekull”.
The Guardian, përshtati në shqip ©LAPSI.AL
