Elbasani dhe Skënderbeu prodhuan një ndeshje me shumë emocione, por asnjë gol në stadiumin “Elbasan Arena”. Përballja e javës së 28-të u mbyll me rezultatin 0-0, edhe pse të dyja skuadrat patën raste të arta për të marrë fitoren.
Një ndeshje me gjithçka… përveç golave
Takimi nisi me intensitet të lartë, ku Elbasani kontrolloi më shumë lojën dhe kërkoi me ngulm avantazhin. Shtylla dhe traversa ndaluan verdheblutë në disa raste, ndërsa Skënderbeu, edhe pse me një lojtar më pak për rreth 40 minuta, mbeti i rrezikshëm në kundërsulme.
Lexo më tej: Tirana, poker për mbijetesën: Shkëmbi del nga zona e rënies dhe fut në rrezik Laçin
Momentet kulmore të sfidës erdhën në pjesën e dytë. Në minutën e 57-të, Dumfur u ndëshkua me kartonin e dytë të verdhë, duke lënë korçarët me 10 lojtarë. Ky episod rriti presionin e Elbasanit, që në minutën e 73-të fitoi një penallti pas prekjes së topit me dorë nga Estrela. Megjithatë, Musta nuk arriti të përfitonte, pasi gjuajtja e tij përfundoi në shtyllë.
[video width="654" height="360" mp4="https://cdnimpuls.com/lapsi.al/wp-content/uploads/2025/03/67c9d60bbc37e.mp4"][/video]
Vetëm pak minuta më vonë, Kasa provoi nga goditja e dënimit, por topi u ndal nga traversa, duke konfirmuar se fati nuk ishte në anën e Elbasanit. E megjithatë, Ernest Gjoka, tekniku i Skënderbeut nuk mund të jetë i kënaqur: “Ne nuk na bën punë një pikë na duhen 3. Janë disa momente që duhet të sakrifikojmë. Nëse do të hiqnim sulmuesit Elbasani do të na sulmonte më shumë. Bismarku është shumë i rëndësishëm për ne dhe skuadra i përshtatet shumë. Sot ishim pak më të butë se herët e tjera, ishte ndeshje e vështirë".
Pasojat në renditje
Ky barazim lë Skënderbeun në vendin e fundit me 27 pikë, ndërsa Elbasani afrohet edhe më shumë me Partizanin, që mbyll zonën e Final Four. Me këtë rezultat, verdheblutë mbeten 5 pikë larg objektivit të tyre.
