Brahim Díaz shpërthen pas golit, i bërtet në fytyrë Simeones: “Fole dje! Fol tani!”

“Fole dje! Fol tani!” Brahim Díaz ishte i tërbuar. Adrenalina e golit të dytë ndaj Atlético Madrid çliroi gjithë emocionet e akumuluara. Ai kishte diçka që i rëndonte në stomak dhe e nxori bashkë me gjithë mllefin për fjalët që trajneri i Atletico Madrid, Diego Simeone, kishte thënë një ditë para ndeshjes së parë të 1/8-ve të Champions League kundër Real Madrid. “El Cholo” kishte shprehur dyshime nëse anësori ofensiv do të ishte titullar në sfidën në “Bernabéu”. Brahim e kishte mbajtur mend këtë dhe ia përplasi në fytyrë pikërisht në momentin e tij më triumfues, aq sa Carlo Ancelotti u detyrua ta thërriste pranë (zyrtarisht për t’i dhënë udhëzime taktike), por edhe për ta qetësuar dhe për ta mbajtur të fokusuar. Ishte e pamundur të mos vërehej ajo skenë menjëherë pas magjisë teknike të Brahim Díaz, i cili në momentin më delikat të ndeshjes – kur rezultati ishte 1-1 dhe duhej një shkëndijë për ta ndryshuar ekuilibrin – dribloi mbrojtësin, e la në tokë dhe lëshoi një goditje të pakapshme për një portier të shpejtë si Oblak. Pas festës kolektive, ai u drejtua nga pankinat dhe, duke parë nga Simeone, filloi t’i bërtasë: “Fole dje! Fol tani! Fol tani!”. Madje bëri disa hapa pranë trajnerit të Atleticos, duke e kërkuar me shikim dhe duke e sfiduar hapur.

?️ Simeone yesterday: "I don't think Brahim will start tomorrow." Brahim after scoring: "Talk now, talk now, you spoke yesterday, talk now." ??? pic.twitter.com/MZkr0HBeez

— fan (@NoodleHairCR7) March 4, 2025

Çfarë e kishte acaruar Brahim Diaz?

Për të kuptuar më mirë këtë shpërthim, duhet të kthehemi pak orë pas. Simeone, në konferencën për shtyp para ndeshjes, kishte analizuar mungesat e Real Madrid (Bellingham i pezulluar dhe Ceballos i dëmtuar) dhe ishte shprehur se madrilenët me shumë mundësi do ta kompensonin këtë me një treshe mesfushore të përbërë nga Camavinga, Modric dhe Tchouaméni. “Ka edhe mundësi të luajë Brahim”, kishte shtuar ai, “por nuk e besoj, sepse Reali ka një skemë të preferuar dhe ndoshta do të rreshtohen ashtu siç e njohim”.

Reagimet pas ndeshjes

Pas ndeshjes, Simeone pranoi se ishte i befasuar nga qasja më agresive e Real Madrid, e cila sipas tij nuk ishte ajo që kishte parashikuar. Sa për Brahim Díaz, ai nuk u rikthye drejtpërdrejt te polemika me trajnerin argjentinas, por u shpreh: “Jam këtu për të dhënë kontributin tim, kjo është e vetmja gjë që duhet të bëj. Goli ishte i bukur, por nuk ka përfunduar ende. Na pret ndeshja e kthimit dhe duhet të japim maksimumin. Gjithçka mbetet e hapur, kjo është Champions League dhe çdo detaj bën diferencën.”