Pas ndeshjes në FA Cup kundër Plymouth Argyle, Jack Grealish shfrytëzoi disa orë për t’u çlodhur. Futbollisti i Manchester City, i cili këtë sezon është penguar nga disa dëmtime, doli me disa miq në disa lokale, një prej të cilëve i njohur për çmimet shumë të ulëta. Duke gjykuar nga pamjet e daljes së tij, Grealish duket se e ka tepruar me alkoolin deri në pikën sa i është dashur ndihmë për të qëndruar në këmbë.
Në thelb, ai shfrytëzoi kohën e lirë pas angazhimeve me Manchester Cityn për të dalë dhe për të takuar tifozët. Kështu, pranë North Biddick Social Club afër Sunderland, ish-lojtari i Aston Villa bëri foto me fansat dhe adhuruesit e tij. Më pas, bashkë me dy persona të tjerë, përfitoi nga çmimet e ulëta të lokalit, ku një gotë birrë kushton nga 2.94 deri në 3.60 paund (rreth 4 deri në 4.50 euro), një shishe prosecco 9.90 paund (rreth 12 euro) dhe pijet e forta rreth 4 euro.
Pamjet që bënë xhiron e rrjeteve sociale
Në faqen zyrtare në Facebook të njërit prej lokaleve që vizitoi, u publikuan disa foto të Grealish me tifozët, duke nënvizuar mirësinë dhe gatishmërinë e tij për të pozuar me ta. Mbrëmja e tij u mbyll në pub-in irlandez The Dubliner, ku duket se ka vazhduar me disa pije të tjera. Në një video të shpërndarë gjerësisht në rrjetet sociale dhe të publikuar nga shtypi anglez, ylli i Manchester City shihet duke dalë nga lokali në një gjendje të vështirë.
Lexo më tej: Plymouth rrezikoi ta eliminonte, Guardiola fajëson topin e FACup: “Mezi kontrollohet”
Pamja e tij tregon qartë lodhjen dhe konsumimin e tepërt të alkoolit, ndërsa një shishe qelqi në dorë duket se konfirmon gjendjen e tij të dehur. Edhe ecja e tij e pasigurt tregonte qartë mungesën e kthjelltësisë, aq sa në një moment iu desh ndihma e një shoku për të arritur te makina.
Një tjetër episod nga Grealish
Nuk është hera e parë që Jack Grealish përfshihet në situata të ngjashme me alkoolin. Kujtojmë festimet e tij të tepruara pas triumfeve me Manchester Cityn, me disa pamje që u bënë virale. Këtë herë, lojtari përfitoi edhe nga sezoni zhgënjyes i Citizens, të cilët pasi u eliminuan nga Champions League, nuk do të luajnë deri në fundjavë. Një mbrëmje e lirë edhe nga angazhimet familjare, pasi e fejuara e tij mbeti në shtëpi, siç e konfirmoi ajo vetë në rrjetet sociale.
